Tags-Sharab

nāseh kī shikāyat vahī zaḳhm-e-jāñ hai
sāqī-o-sharāb hī kā nauha-ḳhvāñ hai

ek sāġhar pī ke būḌhā ho javān
vo sharāb ai mai-kade ke pair khīñch

tamām-tar usī ḳhāna-ḳharāb jaisā hai
mire lahū kā nasha bhī sharāb jaisā hai

hijr kā māhtāb hai niiñd na koī ḳhvāb hai
tishna-labī sharāb hai nashshe meñ mast 'amīr-imām'

laao pyāla-e-sharāb ghir ke phir aayā hai sahāb
ab nahīñ mere dil ko taab bād-e-bahār phir chalī

dil-o-jigar ko huā gavārā kahāñ surūr-e-sharāb-e-hastī
milā kabhī iztirār meñ ye kabhī use be-qarār dekhā

jaagī jaagī un āñkhoñ kā aalam na pūchh
sāmne ek jām-e-sharāb aa gayā

pī bhī jā shaiḳh ki saaqī kī ināyat hai sharāb
maiñ tire badle qayāmat meñ gunahgār rahā

tum apne ġham kī talḳhī bhī milā do
sharāb-e-zindagī meñ hai nasha kam

tum ghaTāoñ kā ehtimām karo
izn-e-jām-e-sharāb ham deñge

jahāñ pe chhāyā sahāb-e-mastī baras rahī hai sharāb-e-mastī
ġhazab hai rañg-e-shabāb-e-mastī ki rind o zāhid bahak rahe haiñ

bahār hai yā sharāb-e-rañgīñ nashāt-afroz kaif-āgīñ
guloñ ke sāġhar chhalak rahe haiñ guloñ pe bulbul chahak rahe haiñ

milā ke qatra-e-shabnam meñ rañg o nik.hat-e-gul
koī sharāb banāo bahār ke din haiñ

ilāhī vasf ho dil meñ to mere itnā ho
bharūñ jo chullū meñ paanī sharāb ho jaa.e

kahāñ se dekhiye mauj-e-surūr uThtī hai
nigāh-e-nāz bhī hai sāġhar-e-sharāb bhī hai

do-ātisha sar-e-ruḳhsār ho ga.e aañsū
guloñ pe qatra-e-shabnam nahīñ sharāb bhī hai

varna ai shaiḳh-e-shahr vājib thī
jām-dārī sharāb-ḳhāne kī

na to pyaas huuñ maiñ sharāb kī na hī ghūñT huuñ maiñ sharāb kā
bujhī pyaas jo na jagā sake vahī ghūñT huuñ maiñ ayāġh kā

jo un ko lipTā ke gaal chūmā hayā se aane lagā pasīna
huī hai bosoñ kī garm bhaTTī khiñche na kyuuñ kar sharāb-e-āriz

ḳhāk-e-chaman pe shabnam o gul kā ajab hai rañg
sāġhar kisī se chhūT paḌā hai sharāb kā