Tags-Sharab

adā adā tirī mauj-e-sharāb ho ke rahī
nigāh-e-mast se duniyā ḳharāb ho ke rahī

ham mai-kashoñ ko Dar nahīñ marne kā mohtasib
firdaus meñ bhī sunte haiñ nahr-e-sharāb hai

ġhair ko saaqī ne jab bhar kar diyā jām-e-sharāb
āñ.suoñ se ho gayā labrez paimānā mirā

apne hāthoñ pilā.e ḳhushbū tū
saada paanī sharāb hai pyāre

sharāb-e-nāb kī kartā mazammat phir na bhūle se
jo mai-ḳhāne meñ vaa.iz kī marammat aur ho jaatī

are sharāb-e-ḳhirad ke kaifī na kar tuuñ da.avā-e-puḳhta-magzī
mai-e-mohabbat kā jaam pī tuuñ ki ab talak zarf ḳhaam haigā

haiñ baham mauj-e-sharāb o sail-e-ashk o jū-e-ḳhūñ
lā.iq-e-sajda hai jis ko ḳhāk-e-mai-ḳhāna kaheñ

aḳhīr vaqt hai kis muñh se jā.ūñ masjid ko
tamām umr to guzrī sharāb-ḳhāne meñ

sharāb o gul-badan saaqī maze aish-o-tarab har-dam
bahār-e-zindagī kahiye to hai mausam javānī kā

sharāb-e-ishq kā mai-kash rahā sadā mad.hosh
terī nigāh kī mastī chaḌhī ḳhumār ke ba.ad

pūchhte jaate haiñ ye ham sab se
majlis-e-vāz meñ sharāb bhī hai

pahle sharāb ziist thī ab ziist hai sharāb
koī pilā rahā hai piye jā rahā huuñ maiñ

aise aate haiñ vo mirī jānib
jaise jām-e-sharāb aatā hai

sharāb ġhair ko de kar jalā na har karvaT
na dil ko aag pe tū sūrat-e-kabāb phirā

āzād haiñ sharāb ke aadī nahīñ 'habīb'
ahbāb gar pilā.eñ to inkār bhī nahīñ

sharāb pī ke maiñ pahuñchā falak pe ai saaqī
kahāñ se un ka.ī qatroñ meñ ye asar aayā

lā.iye pilvā.iye jām-e-sharāb
dekhiye badle vo aa.ī dekhiye

jām-e-sharāb ab to mire sāmne na rakh
āñkhoñ meñ nuur haath meñ jumbish kahāñ hai ab

jādū-asar the hoñT ki sāġhar ko chuum kar
kuchh aur hī sharāb kī tāsīr kar ga.e