Tags-Sher

sher meñ tazkira-e-dasht-o-bayābāñ ho magar
ik baḌe shahr meñ ghar apnā basāyā jaa.e

yahāñ pe sher kahnā yuuñ hai jaise
diyā din meñ jalāyā jā rahā hai

duniyā mushā.era hai so zaḳhmoñ kī daad ho
ham aa.e chand sher sunā.e nikal ga.e

lā-valad kahte haiñ ham ko lā-valad
sher se az-bas-ki aulādī haiñ ham

kaash hastī bhī mirī daad ke qābil hotī
sher lete haiñ mire daad magar maiñ to nahīñ

lafz kī bāzīgarī se sher kā kyā vāsta
shā.irī meñ ai 'valī' jādū-bayānī aur hai

fusūn-e-sher se ham us mah-e-gurezāñ ko
ḳhalāoñ se sar-e-kāġhaz utaar laa.e haiñ

mirī shāḳh-e-sher rahe harī de mire suḳhan ko sanobarī
mirī jhiil meñ bhī kañval khilā mirī gudḌiyoñ ko bhī la.al de

had ḳhush aayā ye sher-e-'mīr' mujhe
kar ke laayā thā muntaḳhab koī

ai 'sehr' qadr-dāñ jo na ho koī sher kā
to zindagī hai maut suḳhnavar ke vāste

ham agar mahrūm hoñge ahl-e-fan kī daad se
sher kahne kī kise phir aarzū rah jā.egī

vo koī aur hai 'alvī' jo sher kahtā hai
tum is ke jurm kī dete ho kyuuñ sazā mujh ko

kisī ḳhayāl meñ tartīb koī thī hī nahīñ
so sher koī bhī āhañg se na kah paayā

is rupahlī sharāb-e-nūrīñ se
kaash maiñ jām-e-sher bhar saktā!

sher vahī hai jis meñ 'sirāj'
ḳhud taḌpe rūh-e-jazbāt

'momin'-o-'alvī'-o-sahbā.ī'-o-'mamnūn' ke ba.ad
sher kā naam na legā koī daanā hargiz

lahū kā ghūñT bharte haiñ tabhī chashma ubaltā hai
kisī ke sher meñ jiddat bahut mushkil se aatī hai

dil mujassam sher-o-naġhma vo sarāpā rañg-o-bū
kyā fazā.eñ haiñ ki jin meñ hal huā jaatā huuñ maiñ

bain kartī auratoñ se
ham pūchh rahe haiñ 'mīr' ke sher kā matlab

mū se hai bārīk sher-o-shā.erī ke darmiyāñ
ma.anī-e-misrā-e-qāmat kyā qayāmat zarf hai