Tags-Sher

'lutf' ye sher kahā jis ne ajab shā.er thā
jis ke sunñe se hue TukḌe hazāroñ dil ke

sher-o-suḳhan meñ yuuñ to guzārī tamām umr
is par bhī 'āzam' ek suḳhan-dāñ na ban sakā

'mīr'-o-'ġhālib' kī tarah sehr-bayāñ se nikle
sher aisā bhī koī dil se zabāñ se nikle

hamāre sher haiñ ab sirf dil-lagī ke 'asad'
khulā ki fā.eda arz-e-hunar meñ ḳhaak nahīñ

nasr tamām tar fuzūl
sher asar-e-fagan na thā

sher hamāre sun kar aksar dil vaale ro dete haiñ
ham bhī liye phirte haiñ dil meñ dard kisī shahnā.ī kā

sher ke dāḳhlī tarannum meñ
ik sukūñ-ḳhez be-qarārī hai

utar aatā hai vo shoḳhī pe yuuñ bhī mehrbānī kī
mire ik sher kī mohlat ko maah o saal detā hai

sahīfe fikr-o-nazar ke jo de ga.e tartīb
vahī to sher-o-suḳhan ke payambaroñ meñ rahe

arz-e-dakan meñ baat chalī hai kuchh is tarah
'sāqib' dayār-e-sher meñ tanhā dikhā.ī de

nā-qadrī-e-jahāñ se ka.ī baar aa ke tañg
ik umr sher se rahā bezār 'mus.hafī'

kisī ġhazal kā koī sher gungunāte chaleñ
tavīl rāheñ vafā kī haiñ aur safar tanhā

dil ko mahv-e-ġham-e-dildār kiye baiThe haiñ
riñd bante haiñ magar zahr piye baiThe haiñ

'jalīl' kyā baat is suḳhan kī ġhazal meñ hai tāzgī chaman kī
jo sher hai shāḳh nastaran kī jo lafz hai phuul yāsmīñ kā

zamīñ pe dil kī lahū ke daraḳht haiñ goyā
ye sher hote nahīñ āsmān se nāzil

jo baat dil se zabāñ tak safar nahīñ kartī
usī ko sher meñ tahrīr kartā rahtā huuñ

jo zamāne se chhupānī thī mujhe har vo baat
sher-dar-sher bayāñ hai ki ḳhudā ḳhair kare

ġhazal ke sher mire kab ke mar ga.e hote
samā.atoñ ne unheñ dekh-bhāl rakkhā hai

sher achchhā ho to phir daad milā kartī hai
kahīñ āvāz kitāboñ meñ chhupā kartī hai

lafz bārish kī tarah mujh par baraste jaa.eñ phir
sher jab kahne lagūñ us ko biThā ke sāmne