Tags-Anjam

tere sūraj ko tirī shaam se pahchānte haiñ
zindagī ham tujhe anjām se pahchānte haiñ

ḳhat-e-abyaz nazar kā dhokā thā
shab kā anjām to siyāhī rahā

kyā jaane kyuuñ dil ne terī yaad kā dāman thaam liyā
majbūrī āġhāz huī jab nākāmī anjām huī

guzartā hai salāmat vāqif-e-anjām matlab se
nahīñ rasta khaTaktā aañkh meñ dahqāñ kī bīhaḌ kā

ḳhudā jaane ki kyā hotā ma.aal apnī mohabbat kā
bahut achchhā huā āġhāz meñ anjām ho jaanā

kyā ishq ke uljhe jaade haiñ manzil kā kahīñ par naam nahīñ
taqdīr hai aur tadbīr nahīñ āġhāz hai aur anjām nahīñ

use ḳhabar hai ki anjām-e-vasl kyā hogā
vo qurbatoñ kī tapish fāsle meñ rakhtī hai

āġhāz to hotā hai anjām nahīñ hotā
jab merī kahānī meñ vo naam nahīñ hotā

āġhāz-e-jafā yaad na anjām-e-vafā yaad
jab sāmne tum aa.e to kuchh bhī na rahā yaad

hai bahut māyūs ye dil dekh kar anjām-e-ishq
phir bhī ham ai ham-nashīñ āġhāz kī bāteñ kareñ

masti-e-gām bhī thī ġhaflat-e-anjām ke saath
do ghaḌī khel liye gardish-e-ayyām ke saath

tum ne nazar jhukā ke jahāñ baat kaaT dī
ham ne vahīñ fasāne kā anjām kar diyā

yārān-e-mai-kada mirā anjām dekhnā
tanhā huuñ aur sāmne ḳhālī gilās hai

aql thak kar lauT aa.ī jāda-e-ālām se
ab junūñ āġhāz farmā.egā is anjām se

āġhāz-e-mohabbat se anjām-e-mohabbat tak
''ik aag kā dariyā hai aur Duub ke jaanā hai''

mar kar bhī tah-e-ḳhāk na āsūda hue aah
ai ishq na the ham tire anjām se vāqif

zindagī mujh ko mile yā maut kā ho sāmnā
jo bhī honā hai vo ho anjām tere shahr meñ

jañg bhī ghaat bhī dhokā bhī riyā-kārī bhī
dostī ke haiñ mire daur meñ anjām ka.ī

ġhaflat meñ kaTī jaatī hai 'mahrūm' javānī
achchhā nazar aatā nahīñ anjām tumhārā