Tags-Anjam

anjām ḳhushī kā duniyā meñ sach kahte ho ġham hotā hai
sābit hai gul aur shabnam se jo hañstā hai vo rotā hai

ishq kī sa.i-e-bad-anjām se Dar bhī na sake
ham tirī chashm-e-ināyat se utar bhī na sake

vafā anjām hotī jā rahī hai
mohabbat ḳhaam hotī jā rahī hai

raat ke nañge badan se ḳhvāhishoñ kī chheḌ-chhāḌ
har-ghaḌī anjām kā Dar aur tanhā aadmī

ma.āl-e-masarrat vo majbūr aañsū
vo kaif-e-tarb kā ġham-anjām honā

ab na vo dil hai na vo dil kī umañgeñ baaqī
aur ab ishq kā anjām kahāñ tak dekhūñ

girya anjām-e-tabassum hai na hañs ai ġhāfil
ḳhuun ro.eñge vahī zaḳhm jo ḳhandāñ hoñge

maiñ ne anjām se pahle na palaT kar dekhā
duur tak saath mire manzil-e-āġhāz ga.ī

nahīñ jānte is kā anjām kyā hai
vo marnā merā dil-lagī jānte haiñ

mutma.in ḳhud hī nahīñ phir asar-andāz ho kyā
pand-e-vā.iz abhī andesha-e-anjām meñ hai

har bure kaam kā anjām burā hotā hai
un ko samjhā do bure kaam se pahle pahle

ziist meñ koshish-e-nākām se pahle pahle
soch āġhāz ko anjām se pahle pahle

kahīñ anjām aa pahuñchā vafā kā
ghulā jaatā huuñ ab ke imtihāñ meñ

jabīn-e-pārsā ko dekh kar īmāñ laraztā hai
ma.āz-allāh ki kyā anjām hai is pārsā.ī kā

us ke qarīb jaane kā anjām ye huā
maiñ apne-āp se bhī bahut duur jā paḌā

is dhuup ke raahī ko anjām se kuchh pahle
ik aisī masāfat de jis par tirā saaya ho

kaliyoñ ke tabassum kī taqlīd to karte haiñ
anjām-e-tabassum par ham ġhaur nahīñ karte

anjām har ik shai kā ba-juz ḳhaak nahīñ hai
kyā hai jo ye aalam ḳhas-o-ḳhāshāk nahīñ hai

raat ko din se milāne kī havas thī ham ko
kaam achchhā na thā anjām bhī achchhā na huā

dil ke afsāne kā āġhāz hasīñ hai 'mītā'
silsila yūñhī chale koī bhī anjām na de