Tags-Anjam

bahut hañsne kī aadat kā yahī anjām hotā hai
ki ham ronā bhī chāheñ to kabhī royā nahīñ jaatā

dekhiye is kā hogā kyā anjām
ab ḳhudā se hameñ huā hai ishq

haañ sair tū kar ġhāfil us gor-e-ġharībāñ kī
anjām tujhe apnā shāyad nazar aa jaa.e

anjām jo bhī ho mujhe is kī nahīñ hai fikr
āġhāz-e-dāstan-e-safar aap hī se ho

zarā sā to dil huuñ magar shoḳh itnā
vahī lan-tarānī sunā chāhtā huuñ

ye be-dilī achchhī hai dīvāna na ban 'vahshat'
anjām tamannā kā hasrat ke sivā kyā hai

ishq-e-nek-anjām ne muzhda diyā
terī nākāmī hai 'nātiq' kāmyāb

is hasti-e-mauhūm meñ hargiz na khulī chashm
mālūm kisī ko nahīñ anjām kisī kā

gāmzan rāh-e-junūñ par haiñ to phir sochnā kyā
kisī anjām se pahle kisī anjām ke ba.ad

apnī is aaj kī tāqat pe na yuuñ itrāo
mehr uTThā thā har ik sub.h-e-shab-anjām ke saath

jabr āġhāz jabr hī anjām
tujh se ḳhāliq mire ḳhafā huuñ maiñ

mujh ko ehsās hai tum bhī merī tarah jān-o-dil kū-e-ulfat meñ haar aa.e ho
ab ye baazī na.e sar se mumkin nahīñ apnā anjām ḳhud soch lo dosto

shāmil yahāñ isbāt meñ pahlū-e-nafī hai
kāmil kisī āġhāz kā anjām nahīñ hai

āġhāz-e-ishq meñ gayā dil haath se mire
anjām kyā ho dekhiye ab mere kaam kā

gar kuchh bhī ḳhabar hotī anjām-e-gulistāñ kī
ham apne nasheman ko ḳhud aag lagā dete

us kī chaah meñ naam nahīñ aane vaalā
ab merā anjām nahīñ aane vaalā

suneñ na dil se to phir kyā paḌī thī ḳhāroñ ko
ki gul ko mahram-e-anjām-e-rañg-o-bū karte

nāqis thī ibtidā to hai anjām-e-ishq bhī
be-rabtī mubtadā meñ jo thī vo ḳhabar meñ hai

ishq ne aql ko dīvāna banā rakkhā hai
zulf-e-anjām kī uljhan meñ phañsā rakkhā hai

hai ishq kā āġhāz hī anjām kā hāsil
anjām nazar aatā hai anjām se pahle