Tags-Anjam

yuuñ to nashāt-e-kār kī sarshāriyāñ milīñ
anjām-e-kār kā bhī rahā Dar kabhī kabhī

vo be-sar-o-tan hai ye zamāna ki ba-īñ-ġhaur
jis kā maiñ kuchh āġhāz aur anjām na paayā

lagne dūñgā na havā tujh ko ḳhizāñ kī maiñ 'zafar'
phuul jaisā tirā anjām na hone dūñgā

āshnā log jo anjām-e-safar se hote
sūrat-e-naqsh-e-qadam aap miTāte ḳhud ko

mire lab pe abhī vo savāl hai kyūñ? mire dil meñ abhī vo malāl hai kyūñ?
mire chāroñ-jānib jaal hai kyūñ? mire ḳhvāb kā ab anjām likho

zarā ai mai-kasho anjām-e-mahfil par nazar rakhnā
ki daur-e-āḳhirī meñ niiñd sī ma.alūm hotī hai

nahīñ haTtī nazar anjām-e-ālam se nahīñ haTtī
use koī ḳhudī gardān le yā be-ḳhudī samjhe

bhūlā to na hogā tujhe suqrāt kā anjām
hāthoñ meñ tire sāġhar-e-sam hai to mujhe kyā

rahne de jām-e-jam mujhe anjām-e-jam sunā
khul jaa.e jis se aañkh vo afsāna chāhiye

sab kā anjām ek jaisā hai
sub.h-e-raushan bhī shaam ko pahuñchī

tirī talab ne falak pe sab ke safar kā anjām likh diyā hai
kisī ko najm-e-sahar kisī ko sitāra-e-shām likh diyā hai

insāñ kā samajhnā hai bāqī, anjām ko pahuñche hai duniyā
ban jaa.e farishta jab chāhe ho jaa.e ye akasr haivāñ bhī

āġhāz to achchhā thā 'fanā' din bhī bhale the
phir raas mujhe ishq kā anjām na aayā

anjām to zāhir thā safeñ TuuT chukī thiiñ
sālār-e-muazzaz sar-e-lashkar bhī nahīñ thā

aa gayā āḳhir kitāb-e-ishq kā anjām bhī
duur tak bikhrā huā manzar hai pahle baab kā

dekhā anjām ishq kā ai dil
jaan āḳhir hameñ diye hī banī

jānte jab the ishq kā anjām
'monā' qismat se phir gila kyā hai

nafas kā qarz chukānā bhī koī khel nahīñ
vo jaan jā.egā anjām apnī bhūloñ kā

rahī jo barq se mahfūz pāmāl-e-ḳhizāñ hogī
ġham-e-anjām-e-shāḳh-e-āshiyāñ yuuñ bhī hai aur yuuñ bhī

āġhāz to hotā hai anjām nahīñ hotā
jab merī kahānī meñ vo naam nahīñ hotā