Tags-Anjam

us kī hī be-ruḳhī kā hai anjām
ham hue duur us kī ulfat se

fikr-e-anjām nahīñ farz kisī mai-kash par
haañ magar bāda-e-āġhāz kī parvā karnā

ādāb-e-chaman anjām to de gul se na haTā titlī ko sabā
ulfat kī hayā mahfūz rahe go tujh meñ hoñ tūfāñ aur sahī

hamesha kyā yuuñ hī qismat meñ hai gintī ginā denā
koī naala na lab par lā.iq-e-anjām aa.egā

ishq meñ bhī koī anjām huā kartā hai
ishq meñ yaad hai āġhāz hī āġhāz mujhe

thak gayā ek kahānī sunte sunte maiñ
kyā is kā anjām nahīñ hotā koī

dil-o-jāñ kar diye nazr-e-nigāh-e-nāz bas maiñ ne
na kuchh āġhāz dekhā hai na kuchh anjām dekhā hai

ba-har-sūrat mohabbat kā yahī anjām dekhā hai
ki jaañ de kar bhī insāñ ko yahāñ nākām dekhā hai

tamām jañgoñ kā anjām mere naam huā
tum apne hisse meñ koī to maat rakh lete

ishq ke baab meñ kirdār huuñ dīvāne kā
maiñ na āġhāz na anjām huuñ afsāne kā

āġhāz-e-mohabbat meñ 'ājiz' ruktī na thī mauj-e-ashk-e-ravāñ
anjām ab in ḳhushk āñkhoñ se ik ashk nikalnā mushkil hai

fasāna-ḳhvāñ dekhnā shab-e-zindagī kā anjām to nahīñ hai
ki sham.a ke saath rafta rafta mujhe bhī kuchh niiñd aa rahī hai

mujhe ḳhabar hai ki anjām-e-vasl kyā hogā
isī liye tire milne kī kuchh ḳhushī bhī nahīñ

kyā sochnā ki shauq kā anjām kyā huā
jab iḳhtiyār pesha-e-farhād kar liyā

tai shuda hai yahāñ anjām azal se sab kā
faisla vaqt ke juzdān meñ rakkhā gayā hai

koī manzil na koī rāhguzar terā karam
koī āġhāz na anjām tirī umr darāz

ḳhūb-sūrat se gul kā paikar huuñ
apne anjām kā patā hai mujhe

shikast-e-ārzū ko ishq kā anjām kyuuñ samjhūñ
muqābil hai mire ā.īna-e-lail-o-nahār ab tak

anjām-e-intihā-e-safar dekhte chaleñ
ab gaañv aa ga.e haiñ to ghar dekhte chaleñ

saaf aatā hai nazar anjām har āġhāz kā
zindagānī maut kī tamhīd hai mere liye