Tags-Anjam

āvārgāñ ke vāste kirdār dasht kā
anjām-kār hīta-e-zindān hī kā hai

phir se āġhāz-e-mohabbat maiñ karūñ to kaise
qaid haiñ ishq ke anjām mirī āñkhoñ meñ

āġhāz hī nahīñ thā so anjām bhī nahīñ
vo gum-shuda hoñ jis kā koī naam bhī nahīñ

ġhalat paḌe na kahīñ pahlā hī qadam ye hamārā
ki ham ne aañkh ko anjām par lagāyā huā hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

sach kī ḳhātir jaan jaatī hai to jaa.e
ham nahīñ Darte kisī anjām se

bashar ko chāhne anjām-e-kār kī kuchh fikr
jahān meñ koī bār-e-digar nahīñ aatā

ik na.ī sub.h kā āġhāz hai anjām ke ba.ad
phir vahī silsila-e-ishq hai ilzām ke ba.ad

jise anjām tum samajhtī ho
ibtidā hai kisī kahānī kī

terā marnā ishq kā āġhāz thā
maut par hogā mire anjām-e-ishq

kitnī hamārī umr-e-mohabbat thī muḳhtasar
āġhāz hī kiyā thā ki anjām aa gayā

kyuuñ ham ne mohabbat kī un se diqqat meñ phañse zahmat meñ phañse
āġhāz hī meñ dil meñ kahtā thā achchhā us kā anjām nahīñ

pyaar hai us ko agar mujh se to anjām ye ho
ghar jale merā dhuāñ us ke makāñ se nikle

un logoñ kī baat karo jo ishq meñ ḳhush-anjām hue
najd meñ qais yahāñ par 'inshā' ḳhaar hue nākām hue

jaañ bhī pur-soz ho anjām-e-tamannā kyā hai
koī batlā.e ki jiine kā bahānā kyā hai

dil gayā diin gayā jaan ga.ī ulfat meñ
aur āġhāz hī dekhā abhī anjām nahīñ

vo kaam merā nahīñ jis kā nek ho anjām
vo raah merī nahīñ jo ga.ī ho manzil ko

dostī apnī jagah aur dushmanī apnī jagah
farz ke anjām dene kī ḳhushī apnī jagah

chorī karnā kaam burā hai chhī chhī chhī
lālach kā anjām burā hai chhī chhī chhī

aa gayā huuñ maiñ dastaras meñ tirī
apne anjām kā pata hai mujhe