Tags-Anjam

ye daur bhī kyā daur hai is daur meñ yaaro
sach bolne vāloñ kā hī anjām burā hai

vahm-e-ta.ayyunāt kā anjām dekhnā
nazdīkiyoñ ko duur kiye jā rahā huuñ maiñ

saaf aatā hai nazar anjām har āġhāz kā
zindagānī maut kī tamhīd hai mere liye

maiñ bachpan meñ khilaune toḌtā thā
mire anjām kī vo ibtidā thī

buto jab ki āġhāz-e-ulfat hai ye kuchh
ḳhudā jaane kyā is kā anjām hogā

vahī dasht-e-azāb-e-māyūsī
vahīñ anjām-kār aayā huuñ

maiñ marne ke liye paidā huā huuñ
mirā anjām hai āġhāz-e-hastī

rahā anjām hai jinkī nazar meñ
unheñ jo chāhe de āġhāz mat de

kis ko ma.alūm thā ik roz ki yuuñ honā thā
mustaqil zabt kā anjām junūñ honā thā

ai ahl-e-vafā ḳhaak bane kaam tumhārā
āġhāz batā detā hai anjām tumhārā

mat pūchhiye ki pyaar kā anjām kyā huā
pyārā chalā gayā hai kidhar raqs kījiye

kahte haiñ anjām us kā maut hai
jis qadar ġham ho ḳhushī kī baat hai

shahr meñ sach boltā phirtā huuñ maiñ
log ḳhā.if haiñ mire anjām se

vajūd ā.ina-ḳhānoñ kā hai fanā-anjām
qazā-e-charḳh-e-dokhānī samajh sako to kahūñ

uḌtā huā ġhubār sar-e-rāh dekh kar
anjām ham ne ishq kā sochā to ro diye

bahār anjām samjhūñ is chaman kā yā ḳhizāñ samjhūñ
zabān-e-barg-e-gul se mujh ko kyā irshād hotā hai

jab kisī lamha-e-daurāñ ko TaTolā ham ne
rū-e-āġhāz nazar aayā hai anjām ke saath

āġhāz se zāhir hotā hai anjām jo hone vaalā hai
andāz-e-zamāna kahtā hai puurī ho tamannā mushkil hai

tū hī to izn thā tū hī anjām huā
tirā bichhaḌnā aur maiñ paara paara thī

har shāḳh-e-chaman hai afsurda har phuul kā chehra pazhmurda
āġhāz hī jab aisā hai to phir anjām-e-bahārāñ kyā hogā