Tags-Anjam

āzādiyoñ kā haq na adā ham se ho sakā
anjām ye huā ki giraftār ho ga.e

is liye naaz hai dariyāoñ se nisbat rakh kar
un kā anjām samundar meñ utar jaanā hai

nafrat o buġhz kā anjām burā hotā hai
nafrat o buġhz se dāman ko bachā kar chaliye

āġhāz-e-mohabbat ke maze ne kiyā ġhāfil
ab tak na the ham us ke bad-anjām se vāqif

be-samt chale to haiñ lekin ham jānte haiñ anjām-e-safar
bekār hai jī ko kalpānā do-chār ghaḌī chalnā hī to hai

dekh anjām mohabbat kā burā hotā hai
mujh se duniyā yahī kahtī hai bas ik tum to nahīñ

tū ne kab ishq meñ achchhā burā sochā 'sarvar'
kaise mumkin hai ki terā burā anjām na ho

aa gayā mujh ko nazar apnī vafā kā anjām
maiñ ne talvār ko qātil se jo dekhā le kar

gul-o-bahār kā anjām hai jinheñ ma.alūm
chaman ko dām-gah-e-hādsāt kahte haiñ

vo sham-e-shab-anjām kī sūrat to nahīñ thā
ik pal meñ shab-e-nisf utar aa.ī hai ghar meñ

husn kā anjām dekheñ ahl-e-husn
ishq merā be-haqīqat hī sahī

maanā ki sa.i-e-ishq kā anjām-kār kyā
be-iḳhtiyār dil pe magar iḳhtiyār kyā

apne parvānoñ ko ai sham-e-musalsal na jalā
zindagī vāqif-e-anjām huī jaatī hai

āñkhoñ pe mujh ko apnī bharosa nahīñ rahā
itnā ḳharāb ḳhvāb kā anjām kyuuñ huā

baap se bachche ai 'mohsin' munharif hone lage
tarbiyat aur ilm ke fuqdān kā anjām hai

aaj ke māhaul meñ insāniyat badnām hai
ye inād-e-bāhamī kā hī faqat anjām hai

fareb-andar-fareb ātish-dar-ātish ai ma.āz-allāh
ḳhudā nā-karda fasl-e-gul tirā anjām kyā hogā

kahe detā hai ḳhud āġhāz hī anjām kyā hogā
tirī ātish-bayānī se charāġh-e-shām kyā hogā

kaun jaane mirā anjām sahar tak kyā ho
aaj koī dil-e-bīmār kā pursāñ bhī nahīñ

vo kabhī āġhāz kar sakte nahīñ
ḳhauf lagtā hai jinheñ anjām se