Tags-Anjam

ulfat kā anjām burā hai
daana achchhā daam burā hai

yahī hogā ki duniyā aql kā anjām dekhegī
had-e-vahshat se baḌh jā.egā dīvāna to kyā hogā

jiite jī ham to ġham-e-fardā kī dhun meñ mar ga.e
kuchh vahī achchhe haiñ jo vāqif nahīñ anjām se

paimāne se paimāne talak bāda-e-la.alīñ
āġhāz se anjām talak daur sī āñkheñ

manzil bhī milegī raste meñ tum rāhguzar kī baat karo
āġhāz-e-safar se pahle kyuuñ anjām-e-safar kī baat karo

dekheñ anjām ho kyā us kā ḳhudā ḳhair kare
dām-e-ulfat meñ phañsā hai dil-e-nākām burā

'aish' āġhāz-e-mohabbat hī meñ thā dil ko kahā
dekh hotā hai bure kaam kā anjām burā

ujḌī huī bastī kī sub.h o shaam hī kyā
ḳhaak uḌāne vāloñ kā anjām hī kyā

ai dil ye junūñ kī manzil hai kuchh sūd-o-ziyāñ kī fikr na kar
har gaam pe yaañ rahrav ke liye āġhāz bhī hai anjām bhī hai

thak gayā ek kahānī sunte sunte maiñ
kyā is kā anjām nahīñ hotā koī

koī sard havā lab-e-bām chalī
phir ḳhvāhish-e-be-anjām chalī

be-tahāshā pyaar kī daulat luTā.ī umr bhar
dostī kā ham ne kuchh anjām sochā hī nahīñ

jism ke bojh ko āġhāz se anjām talak
garche hai ruuh girāñ-bār liye phirtī hai

na jaane mohabbat kā anjām kyā hai
maiñ ab har tasallī se ghabrā rahā huuñ

kabhī āġhāz likhtā huuñ kabhī anjām likhtā huuñ
asīrān-e-mohabbat kī jo sub.h-o-shām likhtā huuñ

muntashir ho ga.e jis vaqt sab ajzā-e-hayāt
qatra dariyā meñ ba-andāza-e-anjām aayā

rātoñ ko tasavvur hai un kā aur chupke chupke ronā hai
ai sub.h ke taare tū hī batā anjām mirā kyā honā hai

tamām shab dil-e-vahshī talāsh kartā hai
har ik sadā meñ tire harf-e-lutf kā āhañg

dil hai mirā rañgīnī-e-āġhāz pe maa.il
nazroñ meñ abhī jaam hai anjām nahīñ hai

āġhāz-e-tamannā ho ki anjām-e-tamannā
ilzām bahr-e-hāl hamāre hī sar aayā