Tags-Anjam

dhuāñ pahle uThtā thā āġhāz thā vo
huā ḳhaak ab ye hai anjām dil kā

dil us be-vafā ko jo dete ho 'akbar'
to kuchh soch lo pahle anjām dil kā

taḌaptā huā yuuñ na paayā hamesha
kahūñ kyā maiñ āġhāz-o-anjām dil kā

jab āġhāz-e-ulfat hī meñ jal rahā hai
to kyā ḳhaak batlā.ūñ anjām dil kā

pahle vo dil meñ soch leñ anjām kyā huā
luknat pe phir kalīm kī kuchh guftugū kareñ

ab is se kyā ġharaz hai ki anjām kyā huā
ye to nahīñ ki terī tamannā na kar sake

anjām-e-vafā bhī dekh liyā ab kis liye sar ḳham hotā hai
nāzuk hai mizāj-e-husn bahut sajde se bhī barham hotā hai

kitnī mahbūb thī zindagī kuchh nahīñ kuchh nahīñ
kyā ḳhabar thī is anjām kī kuchh nahīñ kuchh nahīñ

āġhāz-e-mohabbat meñ maze dil ne uḌaa.e
pūchhe to koī rañj bhī anjām ke uTThe

maut haañ bar-haq hai lekin zindagī faanī kahāñ
qissa-e-hastī ba-anjām-e-tan-āsānī kahāñ

ab jafā se bhī gurezāñ haiñ vo allāh allāh
dekhiye kyā mirā anjām-e-shakebā.ī hai

ruuh larzāñ aañkh mahv-e-dīd dil kā naam thā
ishq kā āġhāz bhī shā.ista-e-anjām thā

dil kī betābī kā āḳhir kahīñ anjām to hai
merī qismat meñ nahīñ dahr meñ ārām to hai

shirākat-e-ḳhas-o-shola hai kārobār-e-junūñ
ziyāñ-kade meñ kis anjām par kahā us ne

āġhāz-e-mohabbat meñ 'ājiz' ruktī na thī mauj-e-ashk-e-ravāñ
anjām ab in ḳhushk āñkhoñ se ik ashk nikalnā mushkil hai

ye jānte haiñ log ki anjām kyā huā
kyoñ aayā inqalāb koī jāntā nahīñ

mujassam dāġh-e-hasrat huuñ sarāpā naqsh-e-ibrat kā
mujhe dekho ki hotā hai yahī anjām ulfat kā

na kaalī raat kaTtī hai na raushan din guzartā hai
kisī se dil lagāne kā yahī anjām hai shāyad

tumheñ bhī raas aa.e yā na aa.e aaj kā aalam
tumhārā bhī hamārī hī tarah anjām hai shāyad

hirs kī bāteñ karne vaalo
is shai kā anjām burā hai