Tags-Shikwa

harf-e-shikva na lab pe laao tum
zaḳhm khā kar bhī muskurāo tum

kitnā nādim huuñ kisī shaḳhs se shikva kar ke
mujh se dekhā na gayā us kā pashemāñ honā

shikva se hī kartā jo koī us se mirā zikr
tū kahtā hai har ik kā gilā maiñ nahīñ suntā

kiyā shikoh-e-sañg ko dukān-e-'bahr'
ham par to pahāḌ TūTte haiñ

nāseh-e-nādāñ kā shikva karnā hai bilkul fuzūl
vo to pāgal hai koī kyuuñ jaa.e phir pāgal ke paas

mujh se shikva bhī jo karte haiñ to ye kahte haiñ
kuchh bhī aatā nahīñ kyā tujh ko shikāyat ke sivā

'zahīr'-e-ḳhasta ye bhī ik usuul pās-e-ulfat hai
zabāñ par kalma-e-shikva kabhī laayā nahīñ jaatā

vo din jo guzre haiñ bholī bisrī hikāyateñ haiñ
ki dostoñ se na koī shikva na dushmanoñ se shikāyateñ haiñ

kāñdhe pe uThā.e haiñ sitam rāh-e-vafā ke
shikva mujhe tum se hai ki do-gām na aa.e

shikva hai ġhair kī kudūrat kā
so mire ḳhaak meñ milāne ko

nāmūs-e-vafā kā paas rahā shikva bhī zabāñ tak lā na sake
andar se to ro.e TuuT ke ham par ek bhī ashk bahā na sake

koī shikva rahe na 'akbar' ko
tū agar ek baar ho jaa.e

ye ḳhulāsa hai daftar-e-ġham kā
kahīñ shikva hai iltimās kahīñ

koī shikva na shikāyat na gila hai tum se
apne hī haath se hastī bhī miTā.ī ham ne

labrez shikva the ham lekin huzūr tere
kār-e-shikāyat apnā guftār tak na pahuñchā

ahbāb kā shikva kyā kījiye ḳhud zāhir o bātin ek nahīñ
lab uupar uupar hañste haiñ dil andar andar rotā hai

shikva ban kar fuġhāñ se uThtā hai
sho.ala-e-ġham zabāñ se uThtā hai

javānī aa.ī murād par jab umañg jaatī rahī bashar kī
nasīb hote hī chaudhvīñ shab shikoh ruḳhsat huī qamar kī

yahī shikva hai be-vafāoñ se
ham na marte jo ye ḳhabar rakhte

maarā hai vasl-e-ġhair ke shikve pe chāhiye
madfan judā judā mirī lāsh-e-do-nīm kā