Tags-Shikwa

aah kyā shikva karūñ maiñ haath se us ke hinā
jab huī mere lahū kī rañg tab dhone lagā

guzārne the yahī chaar din guzār diye
na koī rañj na shikva na ab malāl koī

zabān-e-shikva sivā ab zamāne meñ haihāt
koī kisū se baham dīgar āshnā bhī hai

shikva bedād kā to kyā 'maikash'
lab se naala bhī āshnā na huā

abas hai duurī kā us ke shikva baġhal meñ apne vo dil-rubā hai
chubhī hai qālib meñ jis tarah jaañ use tarīqe se vo chhupā hai

shikva kartā huuñ tabāhī ke to farmāte haiñ
ḳhāna-barbādī-e-ushshāq kī buniyād haiñ ham

karte ho shikva kis kā tum aur bevafā.ī
sar pīTte haiñ apnā ham aur nek-nāmī

har chand umr guzrī āzurdagī meñ lekin
hai sharh-e-shauq ko bhī juuñ shikva nā-tamāmī

dil ne un ko bhī kiyā chashm-e-muravvat ke supurd
aap se the bhī jo kuchh shikva shikāyāt mujhe

be-his ke taġhāful kā to shikva be-sūd
patthar se pighalne kā taqāzā be-sūd

shikva hai kufr ahl-e-mohabbat ke vāste
har ik jafā-e-dost pe shukrāna chāhiye

ab na 'ġhālib' se shikāyat hai na shikva 'mīr' kā
ban gayā maiñ bhī nishāna reḳhta ke tiir kā

sun kar kahā ki kyā mire lagtī hai dil meñ aag
shikva se jab kare hai tū iz.hār bas jī bas

na zabt se shikva lab tak aayā na sabr ne aah khīñchne dī
rahā dahan meñ vo qufl ban kar girāyā chhātī pe sañg ho kar

sirf rāhzan hī se kyuuñ 'amīr' shikva ho
manziloñ kī rāhoñ meñ rāhbar bhī haa.il hai

'ārzū' shikva-ba-lab ho to rahe ho lekin
fā.eda guzrī huī baat ko dohrāne se

tujh se shikva na koī ranj hai tanhā.ī kā
thā mujhe shauq bahut anjuman-ārā.ī kā

kyā kareñ shikva tirī be-e.atidālī se raqīb
vo bulā.e bhī na aa.e aap mehmān ho ga.e

shikasta-pā.ī-e-mīr-e-safar kā kyā shikva
ki rāh-e-shauq meñ kuchh sust-e-gām ham bhī the

shikva to hai dūsroñ se lekin
nārāz haiñ apne aap se ham