Tags-Shikwa

sun ke shikva hashr meñ kahte ho sharmāte nahīñ
tum sitam karte phiro duniyā pe sharmāne ko ham

mirī jānib se un ke dil meñ kis shikve pe kiina hai
vo shikva jo zabāñ par kyā abhī dil meñ nahīñ aayā

shikva-e-husn ye hai jab kabhī tum jā nikalte ho
to but-ḳhāne se yā-allāh kī āvāz aatī hai

kis se shikva kareñ vīrānī-e-hastī kā 'hayāt'
ham ne ḳhud apnī tamannāoñ ko jiine na diyā

ham kahāñ aur javāz-e-shikva kahāñ
naala iz.hār-e-be-kasī hai faqat

shikva na ho tasalsul-e-āh-o-fuġhāñ rahe
vo chāhte haiñ aag na bhaḌke dhuāñ rahe

shikva us but kā har kisī se 'nizām'
us se kah de ḳhudā kare koī

kisī charāġh se shikva nahīñ kiyā maiñ ne
jalāyā ḳhūn-e-jigar aur raushnī kar lī

maiñ laakh rahūñ yūñhī ḳhāk-basar shādāb raheñ tire shām-o-sahar
nahīñ us kā mujhe shikva bhī koī mirā chain gayā mirī niiñd ga.ī

shikva dushman kā karte Dartā huuñ
ho vahī mār-e-āstīñ na kahīñ

ab na dīvār se shikva hai na saa.e kī talab
dhuup jab merā muqaddar hai to phir ġham kaisā

shikva ġhalat hai rahmat-e-parvardigār se
mujh ko hī qadr-e-ashk-e-nadāmat nahīñ rahī

nasīboñ se apne hai shikva hameñ
kareñ kyuuñ kisī kī shikāyat abas

itnā junūn-e-shauq diyā kyuuñ ḳhauf jo thā rusvā.ī kā
baat karo ḳhud qābil-e-shikva ulTe mujh ko rahne do

sab kā ahvāl vahī hai jo hamārā hai aaj
ye alag baat ki shikva kiyā tanhā ham ne

dil kī taklīf kam nahīñ karte
ab koī shikva ham nahīñ karte

bad-gumāñ aap haiñ kyuuñ aap se shikva hai kise
jo shikāyat hai hameñ gardish-e-ayyām se hai

kabhī shikva-zan kabhī nukta-chīñ kabhī bāġhiyoñ kā himāyatī
ye 'ḳhalish' hai kaun kaho use rahe e'tidāl ke darmiyāñ

ai dil-e-shikva-sanj kyā guzrī
kis liye hoñT rah ga.e sil ke

jo ham ye tifloñ ke sañg-e-jafā ke maare haiñ
butoñ kā shikva nahīñ ham ḳhudā ke maare haiñ