Tags-Shikwa

nīm-bāz āñkheñ tumhārā naam thā vird-e-zabāñ
zaḳhm-e-dil par haath thā lab par magar shikva na thā

ham ko ye gila mahbūb unheñ afsāna-e-bazm-e-aish-o-tarab
shikva ye unheñ ham un se dil-e-ranjūr kī bāteñ karte haiñ

tere har ġhamze kī tah meñ hai banāvaT kā shikva
jis ke aage sar-ba-sajda ma.asiyat ke dasht-o-koh

yuuñ to shikva bhī hameñ ā.īna-rū aatā hai
hoñT sil jaate haiñ jab sāmne tū aatā hai

ḳhat ke phaTne kā tum se kyā shikva
apne tāle.a kā ye likhā sāhab

'habāb' shikva bajā laao naqd-e-jāñ ke tufail
tumhāre naam kā sikka yahāñ bhī chaltā hai

hotā hai to bas ek tire hijr kā shikva
varna to hameñ koī shikāyat nahīñ hotī

ġham-ḳhez-o-ġham-shanās mirī pur-shikoh raat
kab aaogī pahāḌ sā ye din guzār ke

hamāre muñh se aur shikva tumhārā ho nahīñ saktā
tumhārā naam bhī shāyad baḌī mushkil se niklegā

go ġham aziiz hai mujhe tere firāq kā
phir bhī is imtihān kā shikva karūñgā maiñ

tumhārī shaan hamārī bisāt kyā hai yahāñ
shikoh-e-ḳhusrav-e-ḳhāqān ek raat kā hai

duniyā to chalo ġhair thī shikva nahīñ us se
tū ne bhī to auqāt dikhā dī hai chalā jā

us sitamgar kā meñ ai 'rāz' karūñ kyā shikva
har balā mere liye jis ne ravā rakkhī hai

ne shikva-mañd dil se na az-dast-dīda huuñ
is baḳht-e-nā-rasā se aziyyat-kashīda huuñ

reza reza ho rahe haiñ ā.īne iḳhlās ke
apnī āñkhoñ se ye manzar dekh par shikva na kar

shikva be-fā.eda kartā hai kisī kā hamdam
thā muqaddar meñ likhā yuuñ hī ziyān-e-dehlī

shikva nahīñ sitam kā par ab ye dekhtā huuñ
tum ko sitamgarī kī bīmārī ho ga.ī hai

kareñ kyā un se shikva jo kisī ke dil jalāne ko
faroġh-e-garmī-e-hañgāma-e-mahfil samajhte haiñ

kyā shikva ta.aqqul ke ḳhāmosh tahayyur se
jab apnā tasavvur bhī gūñgā nazar aatā hai

kis ko shikva hijr kā aur kis ko hasrat vasl kī
lutf-parvardā hai merā dil kisī kī yaad kā