Tags-Shikwa

apnoñ kā shikva kis liye aa.e zabān par
ahbāb ke sitam sitam-e-ġhair to nahīñ

shikva sun kar jo mizāj-e-but-e-bad-ḳhū badlā
ham ne bhī saath hī taqrīr kā pahlū badlā

bisāt-e-sākit se koī shikva
na shātir-e-vaqt se gila hai

auroñ se mirā naam ulajhtā hai to uljhe
shikva tujhe kyuuñ ho ki maiñ terā to nahīñ huuñ

phir lab pe tere kalma-e-afsos kis liye
maiñ ne to tere jabr kā shikva nahīñ kiyā

shikāyat thī tumheñ ham se hameñ bhī tum se shikva thā
kareñge kis se phir shikva shikāyat phir kahāñ hogī

zabāñ par merī shikva aa nahīñ saktā zamāne kā
ki har aalam ko maiñ un kā karam mahsūs kartā huuñ

nashāt-e-zīst mayassar nahīñ to kyā shikva
mujhe hayāt se baḌh kar hayāt kā ġham hai

nahīñ ye bhī shikva na aa.e na aa.e
guloñ ko mirā ġham sunāyā to hotā

shikva nahīñ ki sāġhar-o-mīnā badal ga.e
TuuTā ḳhumār kaif-e-shabāna badal gayā

use zid ki 'vāmiq'-e-shikva-gar kisī raaz se na ho bā-ḳhabar
mujhe naaz hai ki ye dīda-var mirī umr bhar kī talāsh hai

us ke zaḳhm chhupā kar rakhiye ḳhud us shaḳhs kī nazroñ se
us se kaisā shikva kiije vo to abhī nādān huā

kisī ke ho ga.e ho tum mujhe shikva nahīñ koī
kisī kī maiñ bhī ab jāgīr ho jā.ūñ ijāzat hai

madd-e-nazar rahī hameñ aisī razā-e-dost
kaaTī zabāñ jo shikva dahan se nikal gayā

mujhe shikva nahīñ be-rahm kuchh tere taġhāful se
khule-bandoñ phire tū haal kyā jaane asīroñ kā

muddat huī habīb se shikva kiye hue
ab us se kuchh savāl karūñ to ġhazal kahūñ

shikva-sanjān-e-tanhā.ī haiñ sab ke sab
merā ġham bhī ġham-e-do-jahāñ ho gayā

shikva bar-haq 'nazīr' ye socho
Thes pahuñchegī ābgīne ko

majbūr haiñ sab apnī uftād tabī.at se
ho sham.a se kyā shikva parvāne ko kyā kahiye

jā-e-shikva nahīñ sulūk us kā
dekhtā huuñ sabhī se ye kuchh hai