Tags-Subah

sub.h-e-nau aa ga.ī tīrgī miT ga.ī shor hai har taraf inqalāb aa gayā
mujh ko Dar hai añdherā koī raat kā muñh pe Daale sahar kī naqāb aa gayā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

varaq-e-dil pe abhī naqsh hai shab-nāma-e-ġham
phir bhī har sub.h ko ham sub.h-e-hasīñ jānte haiñ

us ne kahā
aao sub.h se pahle

maiñ jam.a kartā huuñ shab ke siyāhī qatroñ ko
ba-vaqt-e-sub.h phir un ko palaT ke sotā huuñ

tulū-e-sub.h pe hotī hai aur bhī namnāk
vo aañkh jis kī sitāroñ se dostī ho jaa.e

shab ke kaase meñ thā kitne māhtāboñ kā lahū
sub.h ke taare ko shāyad is kā andāza nahīñ

ye sub.h-o-shām mirī hai na sāz-o-raḳht mirā
hai koī aur jo kartā hai bandobast mirā

sub.h-e-mahshar uThā nahīñ jaatā
ab bhī khultī nahīñ ḳhumār se aañkh

sub.h uThte hī zid kartī hai
aur mujhe dhoñs detī rahtī hai

shab kī tārīkī meñ maiñ ne tujhe pahchān liyā
jab huvaidā na huā sub.h ke āsār se tū

na shaam kī hai ḳhabar aur na sub.h kī pahchān
'sirāj' gardish-e-lail-o-nahār meñ gum huuñ

sub.h kī aas na toḌo ki jiyoge kaise
in havāoñ meñ abhī ek diyā jaltā hai

ufuq pe sub.h-e-bahārāñ kī aamad aamad hai
fazā meñ surḳh phareroñ ke phuul khilte haiñ

vo bahār-e-sub.h-e-raushan ye añdhere shām-e-ġham ke
vo to un kī thī kahānī ye hamārī dāstāñ hai

raat bhar jin kī ziyā se rahe raushan kamre
sub.h-dam un hī charāġhoñ ko bujhāyā jaa.e

sub.h ko de de shaam kī raunaq
shaam ko dard kī sahar kar de

ruuh ko apnī tah-e-dām nahīñ kar saktā
maiñ kabhī sub.h se yuuñ shaam nahīñ kar saktā

mirī sub.h ke sitāre tujhe DhūñDtī haiñ āñkheñ
kahīñ raat Das na jaa.e tirī raushnī se pahle

aane vaalī hai na.ī sub.h zarā der ke baad
kyā koī rāh-e-tamannā ko sajāne kā nahīñ