Tags-Subah

tū mire paas nahīñ hotā ye sach hai lekin
tirī āvāz par har sub.h meñ sote se uThā

vo subah ko is Dar se nahīñ baam par aatā
naama na koī bāñdh de sūraj kī kiran meñ

shab kis se ye ham judā rahe haiñ
tā sub.h nipaT ḳhafā rahe haiñ

yūñhī ruḳhsat hotī jā.egī ḳhushī
yūñhī sub.h-e-ġham nikaltī jā.egī

jhalkā ruḳh-e-raushan pe hasīñ sub.h kā partav
gulnār hathelī pe hinā dene lagī lau

sub.h-dam uTh kar tirā pahlū se jaanā yaad hai
loTnā dil kā jigar kā phaḌphaḌānā yaad hai

saare jahāñ kī shām-e-ġham sub.h-e-bahār ban ga.ī
merī sahar kā mas.ala aaj bhī zer-e-ġhaur hai

kaun sī shab be-nāla-o-zārī maiñ ne nahīñ kī us bin sub.h
kaun sā din be-rañj-o-musībat meñ na ro ro shaam kiyā

jin ke paroñ se sub.h kī ḳhushbū ke rañg haiñ
bachpan udhār laa.e haiñ un titliyoñ se ham

vo jin ko kar gayā be nuur āgahī kā tilism
kahāñ in āñkhoñ ko phir subah raas aa.ī hai

yuuñ hī zāhir ho shab-e-furqat kī sub.h
daaġh pinhāñ kar jo tujh se ho sake

mahak rahī hai sabā sub.h se na jaane kyuuñ
nahā ke aa.ī hai shāyad tire pasīne meñ

sub.h ye fikr ki ho jaa.e shaam
shaam ko ye ki sahar ho jaa.e

kal azān-e-sub.h se pahle fazā-e-quds meñ
maiñ ne dekhā kuchh shanāsā sūrateñ haiñ ham-nashīñ

rakhshā-bandhan kī sub.h ras kī putlī
chhā.ī hai ghaTā gagan pe halkī halkī

panāh letā hai jin majlisoñ meñ tiira nizām
vahīñ se sub.h ke lashkar nikalne vaale haiñ

sub.h tak jaane kahāñ mujh ko uḌā kar le jaa.e
ek āñdhī jo sar-e-shām chalī hai mujh meñ

sub.h karnā shām-e-ġham kā al-amāñ
sham.a ko dāñtoñ pasīna aa gayā

sādiq se bas ik aan meñ ho jaave tū kāzib
dikhlā.ūñ agar tujh ko maiñ us zulf kā ḳham sub.h

sub.h ke taare mirī pahlī duā tere liye
tū dil-e-be-sabr ko taskīñ zarā sī de gayā