Tags-Subah

hai sub.h-e-banaras ruup us kā to shām-e-avadh gesū us ke
vo merī ġhazal hai merī ġhazal tum merī ġhazal kī baat karo

kaliyoñ se dam-e-sub.h jo 'zaidī' ne sunā thā
fitrat kā vo nā-gufta sā paiġhām hamīñ haiñ

raat guzre hue ḳhvāboñ kī ridā oḌhe thī
subah-e-tābīr ke chilman pe bikharne ke liye

jam.a kartī hai mujhe raat bahut mushkil se
sub.h ko ghar se nikalte hī bikharne ke liye

phir sub.h se āshob-e-qayāmat hai jahāñ meñ
chehre pe tire kin ne banāyā hai ye til aaj

na bayāñ ho jo mile sub.h-e-azal shām-e-abad
hashr hai beach kā TukḌā mire afsāne kā

dar khulā sub.h ko pau phaTte hī mai-ḳhāne kā
aks sūraj hai chhalakte hue paimāne kā

dil-e-ḳhush-fahm ko sub.h safar kī raushnī meñ
shab-e-ġham ke liye tayyār karnā chāhiye thā

basar ho mai-kade meñ panj-shamba baiTh kar jis kā
jo mai-noshī meñ kar de sub.h ādīna usī kā hai

jaane shab ko kyā sūjhī thī rindoñ ko samjhāne aa.e
subah ko saare mai-kash un ko masjid tak pahuñchāne aa.e

sūrat-e-sham-e-sar-e-bazm jalā do mujh ko
sub.h ho jaa.e to āñval se bujhā do mujh ko

koī narm havā kā jhoñkā
sub.h nahīñ to shaam chalegā

koī ḳhabar thī āmad-o-imkān-e-sub.h kī
aur us ke ird-gird hisār intizār thā

phuul gulshan meñ mor jañgal meñ
sīm-e-sub.h-o-zar-e-masā dekhā

raat plate meñ dukh rakkhā thā
sub.h ke cup meñ be-zārī thī

ye tasadduq hai un kī zulfoñ kā
merī har sub.h shaam hotī hai

hañsne vaale rulā na auroñ ko
sub.h terī kisī kī raat na ho

jinheñ raas aa ga.e haiñ ye sahar-numā añdhere
ye talāsh-e-sub.h-e-nau meñ kabhī ham-safar the mere

sub.h se pahle ulaT dī us ne chehre se naqāb
ab koī kāfir bhī kar saktā nahīñ inkār-e-sub.h

de subūhī jald saaqī ab nahīñ māh-e-siyām
be-sabab kyuuñ raah dekheñ shaam kī mai-ḳhvār-e-sub.h