Tags-Subah

na to apne ghar meñ qarār hai na tirī galī meñ qayām hai
tirī zulf o ruḳh kā farefta kahīñ sub.h hai kahīñ shaam hai

har dar pe ik baañg lagāveñ bhalā karo bas bhalā karo
ek hī shikva ek hī naala sub.h kiyā aur shaam kiyā

shām-e-visāl se ho kyā mahv-e-fareb-e-ārzū
yaad nahīñ rahī hameñ sub.h-e-vidā-e-yār kyā

sub.h aa.egī janāze meñ liye sūraj ko
yād-e-māzī meñ agar raat pighal jā.egī

subah ko dekh ke ā.īne meñ bose kā nishāñ
muskurāte hue hoñToñ meñ gilā karte haiñ

sub.h har roz isī ġham meñ hameñ hotī hai shaam
aah jāgeñge mire kaun sī ab raat nasīb

raat din ke hañgāme ek muhīb tanhā.ī
sub.h-e-zīst bhī tanhā shām-e-zīst bhī tanhā

tilism-e-sub.h-kāzib ḳhud hī TuuTā
tulūa-e-sub.h-e-nūrānī ke din haiñ

jo dil ko hai ḳhabar kahīñ miltī nahīñ ḳhabar
har sub.h ik azaab hai aḳhbār dekhnā

rizq miTTī kā mirā ḳhuuñ nahīñ banñe vaalā
sub.h ke chehre pe ġhāza koī mal jaane tak

tā-sub.h merī laash rahī be-kafan to kyā
bānū-e-shām nauha-kunāñ hī nahīñ huī

kyā dāstāñ thī pahle bayāñ hī nahīñ huī
phir yuuñ huā ki sub.h azaañ hī nahīñ huī

barā-e-shab bhī kushāda hai merā darvāza
ki sub.h aa.ī to ye mehmāñ bhī kitnī der

vo rāh-rau huuñ ki manzil nahīñ qayām nahīñ
talāsh-e-dost meñ kuchh qaid-e-sub.h-o-shām nahīñ

vo sub.h sub.h nahīñ hai vo shaam shaam nahīñ
ki jis meñ un kī taraf se koī payām nahīñ

varaq pe raat ke likkhī hai sub.h kī tahrīr
ye ek vaqt hai be-rañg-o-nūr sā koī

vasl ke din shab-e-hijrāñ kī haqīqat mat pūchh
bhuul jaanī hai mujhe sub.h kuuñ phir shaam kī baat

sunā karo sub.h o shaam kaḌvī kasīlī bāteñ
ki ab yahī zā.iqe zabānoñ meñ rah ga.e haiñ

mujhe ai 'figār' na mil sakā koī lamha sub.h-e-nashāt kā
mirī zindagī hai vo shām-e-ġham ki jo rūshanās-e-sahar nahīñ