Tags-Subah

vasl kī be-lutfiyāñ bhī lutf se ḳhālī nahīñ
raat bhar dil ko maza detī rahī takrār-e-sub.h

un kī ruḳhsat ik qayāmat thī dam-e-iz.hār-e-sub.h
shaam tak bachtā nazar aatā nahīñ bīmār-e-sub.h

raat bhar merī zabāñ par sar-guzasht-e-shām-e-ġham
un ke lab haiñ āshnā-e-lazzat-e-guftār-e-sub.h

dekhnā kyā jald guzrī hai shab-e-va.ada 'nazar'
vo idhar aa.e udhar zāhir hue āsār-e-sub.h

sub.h se pahle ulaT dī us ne chehre se naqāb
ab koī kāfir bhī kar saktā nahīñ inkār-e-sub.h

de subūhī jald saaqī ab nahīñ māh-e-siyām
be-sabab kyuuñ raah dekheñ shaam kī mai-ḳhvār-e-sub.h

vasl kī shab bujh gayā thā jo hamārā dāġh-e-dil
mehr ban kar ab vahī hai turra-e-dastār-e-sub.h

vasl meñ hai apnī qismat kī ḳhalish bhī yādgār
dāman-e-shab se ulajh jaate haiñ aksar ḳhār-e-sub.h

kho diyā tūl-e-shab-e-furqat ne lutf-e-intizār
dīda-e-be-ḳhvāb ko hai hasrat-e-dīdār-e-sub.h

phuuT niklegā jabīñ se ek chashma husn kā
sub.h uTh kar ḳhanda-e-sāmān-e-qudrat dekhiye

tābinda tāroñ kā tohfa sub.h kī ḳhidmat meñ pahuñchā
raat ne chāñd kī nazr kiye jo taare kam chamkīle the

ḳhud raakh hue sub.h talak sach hai ye lekin
ai raat tire jism ko pighlā to ga.e ham

kyā kahā bād-e-sub.h-gāhī ne
kyā charāġhoñ ne iltimās kiyā

ye kyā fusūñ hai ki sub.h-e-gurez kā pahlū
shab-e-visāl tirī baat baat se niklā

tū jis ke ḳhvāb meñ aayā ho vaqt-e-sub.h sanam
namāz-e-sub.h ko kis tarah vo qazā na kare

de tūl-e-amal na vaqt-e-pīrī
huī sub.h fasāna muḳhtasar kar

sub.h tak kyā kyā tirī ummīd ne ta.ane diye
aa gayā thā shām-e-ġham ik niiñd kā jhokā mujhe

tāroñ se sajā leñge rah-e-shahr-e-tamannā
maqdūr nahīñ sub.h chalo shaam hī aa.e

gulzār-e-jahāñ meñ gul kī tarah go shaad haiñ ham shādāb haiñ ham
kahtī hai ye hañs kar sub.h-e-ḳhizāñ sab nāz-e-abas ik ḳhvāb haiñ ham

na to apne ghar meñ qarār hai na tirī galī meñ qayām hai
tirī zulf o ruḳh kā farefta kahīñ sub.h hai kahīñ shaam hai