Tags-Subah

jin ke paroñ pe sub.h kī ḳhushbū ke rañg haiñ
bachpan udhār laa.e haiñ un titliyoñ se ham

raat bhar fat.h vo kartī rahī ujiyāroñ ko
sub.h-dam apne añdheroñ se bhī ḳhālī ga.ī shab

ḳhvāb-e-gul-rañg ke anjām pe ronā aayā
āmad-e-sub.h-e-shab-e-andām pe ronā aayā

barf meñ phailā shaam dhundalkā tere liye
har ik sub.h kā pahlā ujālā tere naam

raat thoḌī sī hai bas jaane de mil hañs kar bol
nā-ḳhushī tā-ba-kujā sub.h huī jaatī hai

Dhaltī hai mauj mai kī tarah raat in dinoñ
khiltī hai sub.h gul kī tarah rañg-o-bū se pur

tiir kī tarah kirneñ barsīñ sub.h nikalte sūraj kī
lahūluhān thā saarā chehra niiñd se jab bedār hue

sub.h-e-chaman chaman na.ī shām-e-kiran kiran na.ī
ham tirī kā.enāt ko terā jamāl de ga.e

dasht nahīñ hai ye to merā ghar hai lekin jaane kyuuñ
uljhā.e rahtī hai ik vahshat sī sub.h-o-shām mujhe

sub.h be-nūr shaam be-māya
luT ga.ī daulat-e-nigāh kahāñ

zulmat-gah-e-daurāñ meñ sub.h-e-chaman-e-dil huuñ
roko na safar merā maiñ qismat-e-manzil huuñ

chalo zarā dostoñ se mil leñ kise ḳhabar is kī phir kab aa.e
ye sub.h-e-gulgūñ ḳhayāl vaalī ye mushkbū-shām ḳhvāb vaalī

raat ne chheḌ diye bhūle hue afsāne
jaag kar sub.h na karte to bhalā kyā karte

vaqt kī sarkash havāo! jab diyā bujh jā.egā
sub.h kī sūrat meñ us kī raushnī rah jā.egī

sub.h-dam aa jā.egā us kā payām-e-ma.azarat
jis kī ḳhātir aañkh shab bhar jāgtī rah jā.egī

sub.h ke zīna-e-ḳhāmosh pe qadmoñ ke gulāb
shaam kī band havelī meñ hañsī kā jaadū

muñh tirā dekhe jo sote jāgte
sub.h us kī hai usī kī shaam hai

har ek sub.h yahī dil meñ huuk uThtī hai
hameñ bhī naaz se koī jagāne vaalā ho

qadam qadam pe farozāñ haiñ āñsuoñ ke charāġh
unheñ bujhāo to sub.h-e-vatan kī baat karo

thī ḳhaar raah terī mizhgāñ kī yaad phir shab
tā-sub.h ḳhvāb chashm-e-bedār tak na pahuñchā