Tags-Subah

raat ko jaate dekh chukā
sub.h kī aahaT suntā huuñ

bahut udaas hai ab rañg-e-mahfil-e-hastī
jabīñ se sub.h to zulfoñ se shaam paidā kar

hairāñ huuñ tire hijr meñ kis tarah se pyāre
shab roz ko aur sub.h ke ta.iiñ shaam karūñ maiñ

sub.h-e-ummīd shukriya terā
tīrgī ko miTā diyā tū ne

ḳhvāb-e-adam se maiñ abhī chauñkā huuñ duur ho
ai sub.h-e-ġham na apnā mujhe muñh dikhā sarak

ab dhundlī paḌtī jaatī hai tārīki-e-shab maiñ jaatā huuñ
vo sub.h kā taarā ubhrā vo pau phūTī ab maiñ jaatā huuñ

aish jāved un ko hāsil hai jo haiñ terī taraf
tā.er-e-qibla-numā kartā hai sub.h-o-shām raqs

ablaq-e-chashm-e-butāñ kī shoḳhiyāñ chakrā ga.iiñ
āsmāñ par mehr-o-mah karte haiñ sub.h-o-shām raqs

'riyāz' shaam Dhalī ab to ghar ko lauT chalo
tulū-e-sub.h se pahle ke nikle ho ghar se

bas bhī kar 'ātif' ke terī rahbarī se ba.az aa.e
ġhār-e-shab meñ sub.h kā koī sitāra bhī nahīñ

shām-e-hijrāñ kisī sūrat se nahīñ hotī sub.h
muñh chhupā kar maiñ añdhere meñ nikal jā.ūñgā

ye suḳhan jo ham ne raqam kiye ye haiñ sab varaq tirī yaad ke
koī lamha sub.h-e-visāl kā koī shām-e-hijr kī muddateñ

raat bhar jaag ke tāmīr karūñ qasr-e-umīd
sub.h-e-takmīl se pahle use mismār karūñ

qulqul-e-mīnā sadā nāqūs kī shor-e-azāñ
ThanDe ThanDe dīdanī hai garmī-e-bāzār-e-sub.h

raat har vādā-o-paimān amar lagtā thā
sub.h ke saath ka.ī uzr bahāne nikle

zulf kī shaam sub.h chehre kī
yahī mausam janāb de diije

sub.h sūraj bhī use dekhne aayā 'shahzād'
raat chamkā thā jabīñ par jo sitāra kyā thā

sub.h pahchān na paayā koī sūrat terī
dil-e-hañgāma-talab raat tamāshā kyā thā

raat kaT ga.ī hai sub.h ho ga.ī hai
dil ko DhūñDiye mat kab kā jal bujhā hai

safā.ī dil kī kahāñ qadr-e-tīra-rozī meñ
charāġh-e-sub.h hai shab-hā-e-tār ā.īna