Tags-Subah

aayā yaañ se jaanā hī to jī kā chhupānā kyā hāsil
aaj gayā yā kal jāvegā sub.h gayā yā shaam gayā

ishq hamāre ḳhayāl paḌā hai ḳhvāb ga.ī ārām gayā
jī kā jaanā Thahar rahā hai sub.h gayā yā shaam gayā

kyūñkar na shab-e-mah raushan ho kyuuñ sub.h na dāman chaak kare
kuchh vasf-e-rumūz-e-husn to ho kuchh sharh-e-jamāl-e-yār to ho

dam-e-sub.h aaj hai dopahar na vo chahchahe na vo zamzame
vo parinde uḌ ke kahāñ ga.e koī shor gaañv na ban meñ hai

har sub.h chheḌtī haiñ havāoñ kī uñgliyāñ
poshīda ek phuul jo nannhī kalī meñ hai

sub.h talak is shahr meñ jaane kyā ho jaa.e
rishta DhūñDho rātoñ-rāt nikalne kā

ai sham.a ek chor hai baadī ye bād-e-sub.h
maare hai koī dam meñ tire tāj-e-zar pe haath

raat kā patthar na pighlegā shuāoñ ke baġhair
sub.h hone tak na bolo ham-navāo chup raho

hotī thī sub.h-e-īd mirī sub.h par nisār
khātī thī shām-e-aish mirī shaam kī qasam

un se pūchho rizq kī majbūriyāñ kyā chiiz haiñ
sub.h hote hī jinheñ bedār ho jaanā paḌā

ek chehre ko tarastī haiñ nigāheñ sub.h o shaam
zau-fishāñ ḳhurshīd bhī hai chāñdnī ke saa.e bhī

ab us ke ba.ad sub.h hai aur sub.h-e-nau 'majāz'
ham par hai ḳhatm shām-e-ġharībān-e-lucknow

kuchh in rozoñ dil apnā saḳht be-ārām rahtā hai
isī hālat meñ le kar sub.h se tā-shām rahtā hai

ye kaun aa rahā hai sar-e-shām ai 'sahar'
chehre pe nūr-e-sub.h-e-bahārāñ liye hue

sub.h tak thā vahīñ ye muḳhlis bhī
aap rakhte the shab jahāñ tashrīf

maiñ añdheroñ kā musāfir huuñ magar ye ilm hai
raat ke zaḳhmoñ kā marham sub.h kā jhoñkā bhī hai

vahāñ bhejā gayā huuñ chaak karne parda-e-shab ko
jahāñ har sub.h ke dāman pe aks-e-shām hai saaqī

neza-e-subh pe le kar chalnā kal kā sūraj
shab meñ magar ailān-e-naved-e-nusrat mat karnā

shabāb-e-dard mirī zindagī kī sub.h sahī
piyūñ sharāb yahāñ tak ki shaam ho jaa.e

dekheñ kab kirneñ ubhareñgī dekheñ kab taare Dūbeñge
hijr kī shab meñ ab tak yaaro sub.h-e-vatan kī bāteñ haiñ