Tags-Subah

dekhe vo gulshan jo din-do-din rahe yaañ misl-e-gul
ham to shabnam-sāñ 'nasīm' ek dam ke haiñ mehmān-e-sub.h

hijr se vasl is qadar bhārī
sub.h se dil pe haul hai taarī

sub.h sunahrī kyuuñ hai itnī shaam meñ itnī laalī kyuuñ hai
vaqt ne shāyad terī aañkh kī shabnam se muñh dhoyā hogā

shab ne jalva kiyā do-chār tarab-ḳhānoñ meñ
sub.h ke jalve bhī dīvār se aage na ga.e

ek hī muzhda sub.h laatī hai
dhuup āñgan meñ phail jaatī hai

maiñ ka.ī sadiyoñ se gum huuñ ḳhvāb ke sakrāt meñ
āftāb-e-sub.h-e-bedārī mire sar par nikal

sahtī rahtī huuñ vahshateñ 'mariyam'
sub.h miltī hai mujh ko shaam kī daad

dil ne kī piirī meñ paidā ġhaflat-e-ahd-e-shabāb
sub.h kā bhūlā jo manzil par sar-e-shām aa gayā

dīvāne ham haiñ gardish-e-lail-o-nahār ke
hai sub.h sub.h rū-e-parī-shām shām-e-zulf

kab husn-e-ārzī pe laTaktī hai sub.h-o-shām
islām par hai ta.an se har-dam salām-e-zulf

ḳhizāñ ke saiñkaḌoñ manzar haiñ ai fareb-e-ḳhayāl
tulū-e-sub.h-e-bahārāñ kā e'tibār na kar

aah ai murġh-e-chaman kuchh tū bhī vāqif hai ki sub.h
gul ne kyā pūchhā thā hañs kar bāġhbāñ ne kyā kahā

nasīm-e-sub.h ThanDī saañs bhartī hai mazāroñ par
udāsī muñh-añdhere dekhiye gor-e-ġharībāñ kī

sham.a saañ shab ke mehmāñ haiñ ham
sub.h hote to phir kahāñ haiñ ham

sub.h kī chaap ne mujh ko sadā dī maiñ ne baat na kī
shaam kī chup ne mujh ko pukārā maiñ ḳhāmosh rahā

tum kyā mile mizha ke ziyā-bār kū-ba-kū
parde meñ shab ke sub.h kā rū-e-safā milā

vo zulf-e-mushk-bū bikhrī huī thī
khulī chorī nasīm-e-sub.h-dam kī

kahāñ piirī meñ vo raushan-bayānī
zabāñ to hai charāġh-e-sub.h-dam kī

ye apne dhyān meñ rakhnā ki maiñ na aayā to
tulū-e-sub.h kī ḳhātir kise bulā.egā

hone lage ishāre jo har roz sub.h-o-shām
ye dekh ke hamārī paḌosan bigaḌ ga.ī