Tags-Subah

kahāñ tak ai dil-e-shorīda tū aañsū bahāvegā
shab aa.ī sub.h hone par bas itnā bhī na ro kāfir

safīr-e-sub.h kī aahaT pe ho ga.ī bedār
ġhunūdgī meñ jo ḳhvābīda shab-ḳhumārī thī

sub.h kaisī hai vahāñ shaam kī rañgat kyā hai
ab tire shahr meñ hālāt kī sūrat kyā hai

ai vādi-e-ġham ye mauj-e-havā ik sāz-e-rāh-e-sapārāñ hai
ruktī huī rau ḳhvāboñ kī koī yā sub.h chale yā shaam chale

'mohsin' na jaane sub.h numūdār hogī kab
ye shām-e-be-charāġh hī taqdīr ho na jaa.e

har sub.h hādse se ye kahtā hai āsmāñ
de jām-e-ḳhūn 'mīr' ko gar muñh vo dho chukā

hijr ke shahr meñ gulzār kahāñ milte haiñ
sub.h ko dasht samajh shaam ko vīrāna samajh

nikle hai jeb-e-junūn-e-sub.h se juuñ āftāb
daaġh hai chākoñ se uzlat kā garebāñ al-ayāz

ek se silsile haiñ sab hijr kī rut batā ga.ī
phir vahī sub.h aa.egī phir vahī shaam aa ga.ī

kyā tujhe vo sub.h-e-kāzib yaad hai
raushnī se tū ne jab parda kiyā

be-zabāñ kaliyoñ kā dil mailā kiyā
ai havā-e-sub.h tū ne kyā kiyā

simaTtī shaam agar dard ko jagā.egī
to sub.h nauha-e-mātūb gungunā.egī

parinde khoj meñ nikle hue haiñ
mujhe sub.h-e-bahārī DhūñDhtī hai

kho chuke lutf-e-sahar-ḳhezī garāñ ḳhvāb-e-makīn
sub.h-dam band darīchoñ meñ sabā kyā aa.e

rotā huuñ vaqt-e-nāla guzarne se aur bhī
shab ko tulū-e-sub.h ke āsār dekh kar

tārīk misl-e-āh jo āñkhoñ kā nuur thā
kyā sub.h hī se shām-e-balā kā zuhūr thā

yā mirī sub.h meñ raunaq nahīñ hañgāmoñ kī
yā mirī shaam ba-unvān-e-sahar baaqī hai

sub.h bhajan kī taan manohar jhanan jhanan lahrā.e
ek chitā kī raakh havā ke jhoñkoñ meñ kho jaa.e

saaqī tū nazar kījiyo Tuk sub.h-e-chaman ko
is piir ke jalve kā bhalā koī javāñ hai

phuuT chukī haiñ sub.h kī kirneñ sūraj chaḌhtā jā.egā
raat to ḳhud martī hai sitāro tum ko kaun bachā.egā