Tags-Subah

sub.h-e-ishrat zindagī kī shaam ho kar rah ga.ī
hasrat-e-dil maut kā paiġhām ho kar rah ga.ī

sub.h kī pahlī kiran shab kā haTātī hai naqāb
zindagī az-sar-e-nau miltī hai armānoñ ko

yaañ raushani-e-sub.h to vaañ nik.hat-e-gul hai
yuuñ husn-e-gurezāñ kā koī naam nahīñ hai

kaT jā.egī ye raat guzāro kisī karvaT
ab sub.h se pahle to koī shaam nahīñ hai

ai sub.h maiñ ab kahāñ rahā huuñ
ḳhvāboñ hī meñ sarf ho chukā huuñ

sub.h se shaam talak haath se chhuTtā nahīñ jaam
chāhiye apnā taḳhallus kare jaamī saaqī

raat ne giit sunāyā thā kisī sub.h kā giit
giit aisā kahīñ gaayā bhī nahīñ jā saktā

ḳhayāl-e-sham-ruḳh-e-yār meñ jale tā-sub.h
liyā qarār na parvāna-vār saarī raat

agle din kyā hone vaalā thā ki ab tak yaad hai
intizār-e-sub.h meñ vo saare ghar kā jāgnā

rūThne meñ bhī lutf hai 'inshā'
sub.h gar rūThe vo to shaam ko ham

har chiiz de ke jaatī hai apnī nishāniyāñ
har gul meñ rañg-e-sub.h jhalaktā huā bhī dekh

ham ko ai qāfila-e-shauq ye kyā yaad rahe
ki huī sub.h kahāñ aur kahāñ raat huī

thake-māñde musāfir zulmat-e-shām-e-ġharībāñ meñ
bahār-e-jalva-e-sub.h-e-vatan ko yaad karte haiñ

chehra-e-sub.h nazar aayā ruḳh-e-shām ke baad
sab ko pahchān liyā gardish-e-ayyām ke baad

raat bhar sho.ala-e-jāñ ḳhuub baḌhāyā jaa.e
phir dam-e-sub.h hī ḳhvāboñ ko jalāyā jaa.e

kyuuñ ai ġham-e-firāq ye kyā baat ho ga.ī
ham intizār-e-sub.h meñ the raat ho ga.ī

shab bhar ik āvāz banā.ī sub.h huī to chīḳh paḌe
roz kā ik ma.amūl hai ab to ḳhvāb-zada ham logoñ kā

phir usī shab sub.h kī ummīd meñ
mīThī mīThī pyaar kī bāteñ karo

rāt-bhar iqrār kī bāteñ karo
sub.h-dam inkār kī bāteñ karo

shab-e-va.ada fasīl-e-hijr se aage chamaktā hai tirā ism-e-sitāra-jū
ki jaise koī paivand-e-ridā-e-sub.h aa jaa.e kisī qindīl kī zad meñ