Tags-Subah

sub.h kī pahlī kiran pahlī nazar se pahle
ham ko honā hai kahīñ aur sahar se pahle

kaam apnā muñh añdhere ḳhatm kar letī hai raat
ik siyāhī sub.h ke chehre pe mal jaane ke ba.ad

haTā kar ruḳh se gesū sub.h kar denā to mumkin hai
magar sarkār ke bas meñ nahīñ taare chhupā denā

sham.a har shaam tere rone par
sub.h-dam tak charāġh hañstā hai

kyā ḳhabar sub.h ke sitāre ko
hai use fursat-e-nazar kitnī

sub.h-dam rotī jo terī bazm se jaatī hai sham.a
saaf mere soz-e-ġham kā rañg dikhlātī hai sham.a

nasīb meñ jo kabhī sub.h kā ujālā ho
to mil hī jā.egā har raat kyā duā kiije

kitne mānūs log yaad aa.e
sub.h kī chāñdnī meñ kyā kuchh thā

vo sub.h-e-rihā.ī thī yā shām-e-asīrī thī
jab maiñ dar-e-zindāñ se zanjīr uThā laayā

vahī va.ada hai vahī aarzū vahī apnī umr-e-tamām hai
vahī chashm hai vahī raah hai vahī sub.h hai vahī shaam hai

muntazir us ke dilā tā-ba-kujā baiThnā
shaam huī ab chalo sub.h phir aa baiThnā

vasl kī sub.h shab-e-hijr ke ba.ad aa.ī hai
āftāb-e-ruḳh-e-mahbūb kā nazrāna liye

tundī-e-sail-e-vaqt meñ ye bhī hai koī zindagī
sub.h hui to jī uThe raat hui to mar ga.e

kaifiyat shāḳh-e-nihāl-e-ġham kī 'ishrat' sub.h-o-shām
āte-jāte mausamoñ ke qāfile likhte rahe

sub.h kā jhuTpuTā thā shaam na thī
vasl kī raat raat thī hī nahīñ

tulū-e-sub.h kā manzar ajiib hai kitnā
mirā ḳhayāl hai maiñ pahlī baar jaagā huuñ

sub.h ke phuul ko hañstā pā kar
raat kī aañkh meñ kāñTā dekhūñ

ai sub.h-e-nau-bahār kabhī tū idhar bhī aa
ahbāb jānte haiñ ki tujh sā bhī the hamīñ

hai sub.h se kuchh aaj mire dil ko bashāshat
us kūche se qāsid to na ḳhat le ke chalā ho

aao pī lo ke sub.h-e-sādiq hai
aao baiTho hai shaam piite haiñ