Tags-Subah

sub.h tak mire ham-rāh aañkh bhī na jhapkā.ī
maiñ ne har sitāre ko dard-āshnā paayā

jānte ho kyā paayā pūchhte ho kyā paayā
sub.h-dam darīche meñ ek ḳhat paḌā paayā

sub.h-e-nau ke qarīb aate hī
apnā asitiv kho rahī hai shab

vahī sub.h-o-masā vahī shab-o-roz
zindagī hai vabāl kyā kahiye

'mehr' so.e the kis ke saath ki sub.h
ThanDe ThanDe bhī jalte jaate haiñ

qayāmat jahāñ aa.egī aa.egī
yahāñ sub.h aa.e hai shaam aa.e hai

vo sub.h o shaam mirī ruuh meñ haiñ jalva-numā
dil-e-figār o alam-āshnā meñ rahte haiñ

vasl terā rahā na raaz ki sub.h
dar-o-dīvār par tabassum thā

kis ke roke se rukī hai gardish-e-lail-o-nahār
zulmat-e-shab ke pujārī sub.h ke āsār dekh

ab sub.h se tā-shām hai sadiyoñ kī masāfat
har lamha-e-be-qaid hai zanjīr dinoñ meñ

ye zikr aa.ine se sub.h-o-shām kis kā hai
jo gungunāte ho har-dam kalām kis kā hai

kahīñ ilāhī shab-e-judā.ī tamām hone ko aa ga.ī hai
numūd-e-sub.h-e-jazā ho shāyad ki maiñ ne dekhā hai ḳhvāb-e-āriz

jaise sub.h ko sūraj nikle shaam Dhale chhup jaa.e hai
tum bhī musāfir maiñ bhī musāfir duniyā ek sarā.e hai

har sub.h mirī sub.h pe rotī rahī shabnam
har raat mirī raat pe hañste rahe taare

sāmne tere zar-afshāñ hai na.ī sub.h-e-umīd
apnī palkoñ ko zarā dīda-e-ḳhūñ-bār uThā

maiñ ek buuñd sar-e-nok-e-ḳhār-e-sahrā huuñ
tulū-e-sub.h-e-dam-e-āḳhirī meñ dekh mujhe

kahāñ hai shām-e-tamannā malāhatoñ kā vo rañg
kahāñ haiñ sub.h-e-tasavvur sabāhateñ terī

sub.h-e-visāl-e-zīst kā naqsha badal gayā
murġh-e-sahar ke bolte hī dam nikal gayā

maiñ use sub.h na jānūñ jo tire sañg nahīñ
maiñ use shaam na mānūñ ki jo tere bin hai

ai sub.h kī kiran mujhe pyārī hai tū bahut
tujh se lipaT paḌūñgā agar jāgtā huā