Tags-Tajraba

ye tajraba mirā hai ki ik lamha-e-nashāt
miTTī bharī ġhizā ke sivā aur kuchh nahīñ

mujhe yaqīñ hai nasīb merā na saath degā ki tajraba hai
sukūn ko iztirāb kahnā haqīqatoñ ko sarāb likhnā

ye tajraba bhī gardish-e-hālāt se huā
kaise saped hotā hai har āshnā kā ḳhuun

sar barahna shāḳhoñ par ek din vo aatā hai aur gulāb khilte haiñ
tajraba hai ye apnā ham ne bhī yahāñ āḳhir zindagī guzārī hai

darūn-e-ḳhāna-e-dil roz o shab mahshar bapā lekin
zabāñ apnī barā.e-tajraba ḳhāmosh rahtī hai

kyā samjhe the aur tū kyā niklā ye soch ke hī hairān haiñ ham
hai pahle-pahal kā tajraba aur kam-umr haiñ ham anjān haiñ ham

'zākir' ye zindagī kī haqīqat sarāb hai
jab āgahī milī to yahī tajraba huā

ālamoñ kī baat kā 'saurabh' bharosa hai mujhe
tajraba kuchh zindagī kā haañ magar merā bhī hai

chaman ko raushnī dī nazr-e-ātish āshiyāñ kar ke
kiyā ye tajraba ham ne ghar apnā rā.egāñ kar ke

chhuā tū ne jise maarā use ai afa.ī-e-gesū
ye sab tiryāq mere tajraba karne meñ sam Thahre

nā-tajraba-kārī se vaa.iz kī ye haiñ bāteñ
is rañg ko kyā jaane pūchho to kabhī pī hai

ye mirā tajraba hai husn koī chaal chale
bāzi-e-ishq kabhī maat nahīñ hotī hai

itnā bhī muḳhtalif nahīñ merā tumhārā tajraba
jaise ki tum muqīm ho aur kisī jahān meñ

ham ne dekhe the ka.ī ḳhvāb suhāne lekin
tajraba ab huā ḳhvāboñ kā nagar kaisā hai

tajraba ham pe taġhāful kā na kiije varna
kuchh hunar ham bhī karishmā.ī liye baiThe haiñ

ye zāhid haiñ inheñ kyā tajraba ejāz-e-ulfat kā
ye to jannat meñ bhī pūchheñ gunahgāroñ pe kyā guzrī

ḳhudā gavāh faqīroñ kā tajraba ye hai
jahāñ ho sub.h tumhārī vahāñ na shaam karo

yahāñ bas ek nayā tajraba huā 'fāriġh'
ki lamhe lamhe ko mahsūs kar rahā huuñ maiñ

tumhārā tajraba kyā kah rahā hai
karoge phir kisī se dostī kyā

kahāñ hai hijr meñ rahne kā tajraba us ko
tamām umr duā māñgtā rahegā vo