Tags-Tamanna

ham tum mile na the to judā.ī kā thā malāl
ab ye malāl hai ki tamannā nikal ga.ī

āñdhī kī zad meñ sham-e-tamannā jalā.ī jaa.e
jis tarah bhī ho laaj junūñ kī bachā.ī jaa.e

dil meñ jaagī hai kaisī tamannā na.ī ḳhud maiñ hairān huuñ
ik na.ī aarzū ne mujhe chhū liyā raat ke is pahar

phuul har shāḳh pe khilte haiñ bikhar jaate haiñ
kyā tamāshā hai sar-e-naḳhl-e-tamannā dekho

yārab na tā-qayāmat muhtāj huuñ kisī kā
jo ho mirī tamannā vo panj-tan se nikle

tujh se milne kī tamannā hai ki tujh se rah ke duur
e'tibār-e-hastī-e-mauhūm aa saktā nahīñ

baqā kī jañg meñ ḳhud se falak se duniyā se
maiñ laḌ rahā huuñ tamannā kī Dhaal thāme hue

na is se milne kī hai tamannā na us ko paane kī aarzū hai
diyā mohabbat kā jal rahā hai jo jī meñ aa.e kare havā kā

vo din bhī kyā the dil meñ tamannā na thī koī
takmīl-e-ārzū ke liye dar-ba-dar na the

vo kahāñ phir bhī magar lahr tale lahr kī ta.amīr
ki de jis pe jigar-e-tishna-tamannā bhī gavāhī

un ko ma.alūm hai rindoñ kī tamannā kyā hai
aks-e-ruḳh Daal ke bhar dete haiñ paimānoñ ko

shāhid-e-maqsūd tak pahuñcheñge kyūñkar dekhiye
band hai bāb-e-tamannā hai ġhazab khultā nahīñ

zamāne ko tamannā hai tirā dīdār karne kī
mujhe ye fikr hai mujh ko mirā dīdār ho jaa.e

thī jis kī tamannā dil-e-mushtāq ko har dam
vo chiiz agar paa.ī to paa.ī tire dar par

jo daaġh ban ke tamannā tamām ho jaa.e
hameñ to ḳhuun bhī ronā harām ho jaa.e

ek muddat se tamannā thī tumheñ chhūne kī
aaj bas meñ nahīñ jazbāt qarīb aa jaao

kis ko kirdār kī tamannā hai
kaun ab dāstāñ talāsh kare

maiñ jitnā bach ke chalūñ utnā khīñchtā hai mujhe
ajab tilism-e-tamannā ḳhatā meñ shāmil hai