Tags-Tamanna

zinda rahne kī tamannā hai agar
apnā chehra bhī badalte rahiye

muddat se chal rahā huuñ magar tai na kar sakā
'shāhid' ye rāh-e-rāst-e-tamannā bhī ḳhuub hai

darāz dast-e-tamannā nahīñ kiyā maiñ ne
karam tumhārā musalsal nahīñ huā ab tak

bikhrī huī hai dhund sar-e-shīsha-e-talab
be-rañg-o-nūr aks-e-tamannā hai sāmne

jis par mire fareb-e-tamannā ko naaz thā
vo din bhī intizār meñ Dhaltā chalā gayā

paa.ī hai nigāhoñ ne tirī bazm-e-tamannā
rātoñ ko chināroñ ke charāġhāñ se guzar ke

us ne 'shahzād' tirī baat ko Thukrā hī diyā
maiñ na kahtā thā ki iz.hār-e-tamannā na karo

ham DhūñDte phirte haiñ tujhe dair-o-haram meñ
gar hai ye tamannā to kahīñ ke na raheñge

mar jā.eñge iz.hār-e-tamannā hī se pahle
sunñe ko tire muñh se nahīñ ke na raheñge

muddat huī hai ḳhūn-e-tamannā kiye magar
ab tak Tapak rahā hai lahū dil ke jaam se

har tamannā dil se ruḳhsat ho ga.ī
aas kyā TuuTī ki fursat ho ga.ī

ik tarz-e-taġhāful hai so vo un ko mubārak
ik arz-e-tamannā hai so ham karte raheñge

rahā jān-e-tamannā ban ke jab tak jān-e-mushkil thā
na thī mushkil to us ke ba.ad phir kuchh bhī na thā dil thā

dil-e-hazīñ ko tamannā hai muskurāne kī
ye rut ḳhushī kī hai yā riit hai zamāne kī

shab ġhanīmat thī ki ye zaḳhm-e-nazāra to na thā
Das ga.e sub.h-e-tamannā ke ujāle mujh ko

tah-ba-tah mauj-e-talab khīñch rahī hai 'mohsin'
koī girdāb-e-tamannā se nikāle mujh ko

ujaḌ gayā hai kuchh is tarah ab dayār-e-vafā
kahīñ bhī merī tamannā kā naqsh-e-pā na rahā

bahut hai aaj tamannā uḌaan bharne kī
qafas se jā ke hamāre shikasta par laanā

thī tamannā bāġh-e-ālam meñ gul o bulbul kī tarah
baiTh kar ham tum kahīñ ai yaar hañste bolte