Tags-Tamanna

be-sabab ham bhī kisī se nahīñ milte sāhab
tum bhī milne kī tamannā ho to ham se milnā

nahīñ hai dil kā sukūñ qismat-e-tamannā meñ
tumheñ bhī dil kī tamannā banā ke dekh liyā

hameñ to harf-e-tamannā zabāñ pe laanā hai
ye sher aur ye ġhazleñ to bas bahānā hai

maslahat ye hai ki iz.hār-e-mohabbat na karūñ
maut hai mere liye arz-e-tamannā kyā hai

tum se haT kar kahīñ paḌtī hī nahīñ merī nazar
tum tamannā ho mirī aur tamannā kyā hai

bas ab ye ḳhūn-e-tamannā ho nazr-e-vīrāna
talāsh thī hameñ jis kī vo baaġh hī na milā

mire hī ḳhvāb tamannā kī lau meñ jalte rahe
mirā hī aks sar-e-ā.īna dikhā.ī diyā

maiñ bhalā kab thā suḳhan-goī pe maa.il 'ġhālib'
sher ne kī ye tamannā ke bane fan merā

shahīd hone kī ye tamannā na dil se niklegī dekh lenā
uThā.e ḳhanjar vo haath meñ kyā na yaar sambhle jab āstīñ kā

dam-e-ruḳhsat kabhī kuchh dil kī tamannā na kahī
dāman-e-yār udhar pakḌā idhar chhoḌ diyā

junūñ fareb-e-ḳhirad hai ḳhirad fareb-e-nazar
mujhe kahīñ kā na rakkhā mirī tamannā ne

vo kaise musāfir the ki be-zād-e-safar the
siine pe koī bār-e-tamannā bhī nahīñ thā

haañ kuchh to bayān-e-havas-e-dil meñ hai lazzat
jo lab se judā harf-e-tamannā nahīñ hotā

jab nādānī kā aalam thā hāsil kī tamannā karte the
ab dil meñ aag lagāte haiñ sho.aloñ kā tamāshā karte haiñ

ḳhatra hai vafā ke luTne kā majbūri-e-dil bhī lāzim hai
jiine kī tamannā karte haiñ marne kā taqāzā karte haiñ

majnūñ haiñ magar ḳhvāhish-e-lailā nahīñ karte
ham ishq to karte haiñ tamannā nahīñ karte

chhoḌ de ai dil tamannā zindagī kī chhoḌ de
tū halāk-e-gardish-e-ayyām hotā jā.egā

DhūñDūñ ki intihā kī mujhe intihā mile
ye shash-jahāt merī tamannā pe tañg haiñ

ye soch rahā huuñ use kis chiiz kā ġham hai
rahtī hai mire dil meñ tamannā mut.harrik

ajiib shai hai shafaq-rezī-e-tamannā bhī
ki sair-e-jāñ bhī huī dard bhī do-chand huā