Tags-Tamanna

sahe kyā kyā sitam aur ab talak bhī
tamannā hai vafā hai aur maiñ huuñ

sulh-jūī kī tamannā meñ shab-o-roz 'azīz'
yak jahāñ muztarib-e-jañg nazar aatā hai

thī qahqahoñ kī tamannā to aa ga.e aañsū
ḳhushī kī aarzū ġham kī asaas lagtī hai

apnī āvāz ke sannāTe se hol aatā hai
maiñ bayābān-e-tamannā meñ sadā kyā kartā

jab tujh ko tamannā merī thī tab mujh ko tamannā terī thī
ab tujh ko tamannā ġhair kī hai to terī tamannā kaun kare

dil kī tamannā dil meñ rakh
band galī kā rasta chhoḌ

uḌte hue aate haiñ abhī sañg-e-tamannā
aur kār-gah-e-dil kī vahī shīshagarī hai

tahārat kī tamannā hai na dil meñ haq-pasandī hai
magar ma.asūm chehra aur labāda kar liyā tum ne

kis ko sadā.eñ detā hai tū shahr-e-tamannā meñ ai dil
kaun yahāñ hai terā sāthī sabhī to haiñ begāne log

ham vo haiñ kushta-e-tamannā 'shād'
ḳhvāhish-e-dil ko umr-bhar maarā

ilm o hikmat kī tamannā hai na kaunain kā ġham
mere shīshe meñ hai baaqī mai-e-gulfām abhī

tamannā hī se qaa.em hai vaqār-e-naujavānī bhī
tamannā garche jins-e-rā.egāñ mālūm hotī hai

chāñd takne kī tamannā le ke vāpas aa gayā
dūsroñ ke ghar ko apnī chhat se uupar dekh kar

ho jaa.e to ho jaa.e izāfa ġham-e-dil meñ
kyā aql se saudā-e-tamannā ko samajhnā

ye tamannā thī ki ham itne suḳhnavar hote
ik ġhazal kahte to ābād ka.ī ghar hote

jur.at-e-arz-e-tamannā pe ḳhafā ho lenā
muskurāo to zarā nīchī nazar se pahle

abhī zinda huuñ lekin sochtā rahtā huuñ ḳhalvat meñ
ki ab tak kis tamannā ke sahāre jī liyā maiñ ne

dam ghoñTtī rahī huuñ tamannā kā har samay
in hasratoñ kī qabr sajātī rahī huuñ maiñ

havas kā rañg ziyāda nahīñ tamannā meñ
abhī ye mauj hai begānagī ke sahrā meñ

aañkh be-qābū hai duniyā kī tarah
dil hai pahlū meñ tamannā kī tarah