Tags-Tamanna

maiñ shahr shahr phirā huuñ isī tamannā meñ
kisī ko apnā kahūñ koī mujh ko apnā le

ḳhaak meñ mil ga.e ham jis kī tamannā meñ 'jigar'
vo lahad par bhī sambhāle hue dāmāñ niklā

ai shauq-e-dil bhī ek muammā ajiib hai
sahrā ko āñdhiyoñ kī tamannā ajiib hai

na khīñch ai sa.ī-e-dast-e-nā-rasā zulf-e-tamannā ko
pareshāñ-tar hai mū-e-ḳhāma se tadbīr maanī kī

dil kahāñ aur kahāñ shorish-e-paiham dil kī
kis tamannā meñ ravāñ hai tan-e-betāb mirā

is tamannā par kaTe marte haiñ mushtaqān-e-qatl
yaar par qurbān ham se peshtar koī na ho

un kā zikr un kī tamannā un kī yaad
vaqt kitnā qīmtī hai āj-kal

apnoñ se muravvat kā taqāzā nahīñ karte
sahrāoñ meñ saa.e kī tamannā nahīñ karte

kab tak ai bād-e-sabā tujh se tavaqqo.a rakkhūñ
dil tamannā kā shajar hai to harā ho bhī chuke

mahrūm hī rah jaatī hai āġhosh-e-tamannā
sharm aa ke churā letī hai saarā badan un kā

vo ḳhaak bo.e the hālāt ne sharar jis meñ
ab us meñ phuul tamannā ke khilne vaale haiñ

kabhī bād-e-sabā ban kar kabhī jārūb-kash ho kar
tamannā thī musalsal ham tavāf-e-āstāñ karte

ḳhayāl meñ ik na ik maze kī na.ī kahānī hai aur ham haiñ
abhī tamannā hai aur dil hai abhī javānī hai aur ham haiñ

kuchh arz-e-tamannā meñ shikva na sitam kā thā
maiñ ne to kahā kyā thā aur aap ne kyā jaanā

kabhī 'anjum' vo bhī din aa ga.e ki ḳhushī kī bazm sajā.eñge
ye tamannā jo mere dil meñ thī vo yūñhī dharī kī dharī rahī

ik darīche kī tamannā mujhe dūbhar huī hai
vo ghuTan hī mirī sāñsoñ pe muqarrar huī hai

merī ġhazloñ meñ terā hī mazmūn ho merī nazmoñ meñ to mujh se bāteñ kare
yuuñ bayāz-e-tamannā bhī bhartī rahe din nikaltā rahe shaam Dhaltī rahe

jis ko dekhā na kabhī jis kī tamannā bhī na kī
paañv usī shahr ke raste pe jo dharnā paḌ jaa.e

maiñ apne kū-e-tamannā meñ muntazir hī rahā
talāsh kartī rahī dasht meñ bahār mujhe

us kī mahfil meñ pahuñchne kī tamannā mat kar
vo to kūche se guzarne bhī nahīñ detā hai