Tags-Tamanna

baiThe rahe vo ḳhūn-e-tamannā kiye hue
dekhā kiye unheñ nigah-e-iltijā se ham

pahlī sī vo ḳhushbu-e-tamannā bhī nahīñ hai
is baar koī ḳhauf havā kā bhī nahīñ hai

mirī tamannā hai ab ke tum phir milo to jī bhar ke muskurā.eñ
ki dekhnā hai ye raushnī kā safar bahut der ba.ad jā kar

chehra udaas udaas thā mailā libās thā
kyā din the jab ḳhayāl-e-tamannā libās thā

ye merī tamannā hai pyāsoñ ke maiñ kaam aa.uuñ
yārab mirī miTTī ko paimāna banā denā

arsa-e-vasl meñ bhī harf-e-tamannā na khulā
husn-e-ilhām rahā parda-e-āyāt meñ gum

ik ḳhvāb-e-tamannā ne
barbād kiyā hogā

dil ko shā.ista-e-ehsās-e-tamannā na kareñ
aap is andāz-e-nazar se mujhe dekhā na kareñ

taaza ho dimāġh apnā tamannā hai to ye hai
us zulf kī bū sūñghiye saudā hai to ye hai

log mar jaate haiñ jiine kī tamannā le kar
zinda rahne kī jo ḳhvāhish ho to marnā na paḌe

uTh ai barbād-e-tamannā kī na.ī ḳhvāb--kanīz
haram-e-chashm meñ phir raqs ko laa.ī ga.ī hai

vo hañs hañs ke vaade kiye jā rahe haiñ
fareb-e-tamannā diye jā rahe haiñ

maiñ bhī kuchh ḳhvāb sar-e-shahr-e-tamnnā le kar
sar meñ irfān-e-ġham-e-zāt kā saudā le kar

kab tak ai bād-e-sabā tujh se tavaqqo rakkhūñ
dil tamannā kā shajar hai to harā ho bhī chukā

mirā dil bhī ajab ik sāġhar-e-zauq-e-tamannā hai
ki hai ḳhālī kā ḳhālī aur bhartā jā rahā huuñ maiñ

ek tum ho ki tamannāoñ ke dushman hī rahe
ek maiñ huuñ mujhe ehsās-e-tamannā bhī nahīñ

kahāñ hai shām-e-tamannā malāhatoñ kā vo rañg
kahāñ haiñ sub.h-e-tasavvur sabāhateñ terī

jis aañkh meñ hai ḳhūn-e-tamannā mirā 'afroz'
us aañkh meñ surme kī karāmāt to dekho

jo jism tamannā meñ sulagtā hai tumhārī
us jism meñ hasrat bharī ik raat to dekho

un kī mahfil se maiñ le aayā tamannā un kī
log samjhe the ki maiñ be-sar-o-sāmāñ niklā