Tags-Tamanna

hamārā shahr-e-tamannā bahut hasīñ thā magar
ujaḌ ke rah gayā aisā ki phir basā hī nahīñ

gumān-e-zaḳhm-e-tamannā thā ab talak mujh ko
nahīñ hai daaġh bhī dil meñ na thī bhanak mujh ko

kahīñ sadā-e-jaras hai na gard-e-rāh-e-safar
Thahar gayā hai kahāñ qāfila tamannā kā

chamak-damak pe na jaao kharī nahīñ koī shai
sivā.e shāḳh-e-tamannā harī nahīñ koī shai

kyā tamannā thī ye betābī jise ruknā paḌā
tañg thā sehan-e-qafas bulbul phaḌak kar rah ga.ī

mere dil ke zaḳhm aur un kī shamātat dekhiye
hañs diye kisht-e-tamannā jab lahak kar rah ga.ī

hai dil meñ ġhubār us ke ghar apnā na kareñge
ham ḳhaak meñ milne kī tamannā na kareñge

mohabbat dil meñ hotī hai tamannā dil meñ hotī hai
javānī umr kī kitnī hasīñ manzil meñ hotī hai

vahī hotī hai rahbar jo tamannā dil meñ hotī hai
ba-qadr-e-himmat-e-rah-rau kashish manzil meñ hotī hai

ye rishta-e-jāñ merī tabāhī kā sabab hai
is qaid se chhuTne kī tamannā bhī ajab hai

zindāñ zindāñ shor-e-anal-haq mahfil mahfil qul-qul-e-mai
ḳhūn-e-tamannā dariyā dariyā dariyā dariyā dariyā aish kī lahr

vo ābrū-e-vahshat laa.eñ to ab kahāñ se
vo jannat-e-tamannā vo dasht-e-ġham na DhūñDeñ

ab dūsrī duniyā hī sañvar jā.egī shāyad
jannat kī tamannā hai bahut kāvish-e-ġham meñ

aur phir dasht-e-tamannā meñ bhaTakte hue log
ārzū-mand Thikāne kī taraf lauT aa.e

ḳhaak meñ kis din milātī hai mujhe
us se milne kī tamannā dekhiye

yaañ tuḳhm-e-tamannā se ugā kartā hai laala
gul khāte haiñ har fasl meñ do-chār hamesha

dī jis ehsās ne marne kī tamannā ham ko
usī ehsās kī ra.anā.ī ne marne na diyā

ye kār-e-mohabbat bhī kyā kār-e-mohabbat hai
ik harf-e-tamannā hai aur us kī pazīrā.ī

āñdhiyāñ kar deñgī gul 'ishrat' fasīloñ ke charāġh
ik diyā lekin tamannā kā jalā rah jā.egā

ajiib ālam-e-begāñgī meñ aa nikle
garāñ guzartī hai dil par tirī tamannā bhī