Tags-Tamanna

āġhāz se zāhir hotā hai anjām jo hone vaalā hai
andāz-e-zamāna kahtā hai puurī ho tamannā mushkil hai

terī mahbūb nigāhoñ kā payām-e-tajdīd
ik talāfī hī sahī merī tamannā to nahīñ

koī tamannā nahīñ hai mujh ko
sukūn-e-dil kī hī aarzū hai

na jaane harf-e-talab hai nādim ki be-zabānī zabāñ hai apnī
dhaḌak rahā hai dil-e-tamannā ki manzil-e-āshiqī na.ī hai

na huā vasl-e-tamannā na ghaTī vahshat-e-dil
kyā natīja thā mirī bādiya-paimā.ī kā

ham ḳhudā se bhī nahīñ māñgte kuchh
yaañ koī apnī tamannā hī nahīñ

khul ke rone kī tamannā thī hameñ
ek do aañsū nikal kar rah ga.e

ab is se kyā ġharaz hai ki anjām kyā huā
ye to nahīñ ki terī tamannā na kar sake

tū guzargāh-e-tamannā meñ thā ik partv-e-māh
maiñ añdheroñ meñ bhaTaktā huuñ hirāsāñ ab tak

harf-e-ġhazal se rañg-e-tamannā bhī chhīn le
maiñ jal rahā huuñ ātish-e-naġhma bhī chhīn le

ġham tujh ko pyārā tū mujh ko pyārī
dil kī tamannā nāzuk hasīna

ek ek tamannā meñ lākhoñ haiñ tamannā.eñ
armānoñ kī duniyā hai armān mohabbat kā

dil vasl kī lazzat kā talabgār hai lekin
takmīl-e-tamannā ġham-e-furqat hai to haañ aur

rasm-e-duniyā bhī vahī rāh-e-tamannā bhī vahī
vahī mil baiTh ke hañsnā vahī tanhā ronā

roz-e-azal se ishq hai nākām-e-ārzū
dil hai magar hujūm-e-tamannā liye hue

uTThā huuñ ik hujūm-e-tamannā liye hue
duniyā se jā rahā huuñ maiñ duniyā liye hue

bas tamannā hai ishq-e-maulā meñ
ki marūñ maiñ yahī tamannā meñ

mere har ādarsh kā aalam ab to ālam-e-vīrāñ hai
dil meñ terī tamannā jaise mauj-e-reg-e-bayābāñ hai