Tags-Tamanna

dil pe kahtā hai tamannā chhoḌ de
āqilāna baat hai nādān kī

qanā.ateñ hameñ le aa.iiñ aisī manzil par
ki ab sile kī tamannā na ham jazā māñgeñ

ek tujh se hī nahīñ fasl-e-tamannā shādāb
vahī mausam huuñ vahī āb-o-havā huuñ maiñ bhī

kartā nahīñ hai dasht-e-tamannā meñ koī ram
ab vo ġhazāl shauq-e-ḳhutan meñ nahīñ rahā

uTho bāvle ab tumheñ kis tamannā ne manzil kā dhokā diyā hai
ki tum saañs kī oT meñ chup khaḌe sochte ho

be-qarār duniyā meñ tere lauT aane tak
jāgtī tamannā bhī thak ke so chukī hogī

mā.il-e-arz-e-tamannā hai na hai vaqf-e-malāl
ai mire dil tū Thahartā nazar aatā hai mujhe

zarā junūn-e-tamannā se dil guzar jaa.e
phir is ke baad koī daam hai na daana hai

nā-ummīdī laakh qafas ījād kare
tā.ir-e-dil parvāz-e-tamannā māñgtā hai

marne kī duā.eñ kyuuñ māñgūñ jiine kī tamannā kaun kare
ye duniyā ho yā vo duniyā ab ḳhvāhish-e-duniyā kaun kare

hāsil-e-umr-e-ravāñ dāġh-e-tamannā hai faqat
ishq-e-nargis meñ rahī hai ḳhvāhish-e-vaslat mujhe

bujh ga.ī raunaq-e-parvāna to mahfil chamkī
so ga.e ahl-e-tamannā to sitamgar aayā

fasl-e-gul meñ maze uḌā.eñge
ye tamannā bhī ḳhvāb ho ke rahī

koī ḳhvāhish ho tamannā ho bahaktī hai zarūr
ab bhī siine meñ koī chiiz dhaḌaktī hai zarūr

nahīñ ki arz-e-tamannā pe maan hī jaao
hameñ is ahd-e-tamannā meñ āzmāo bhī

ab tasavvur meñ kahāñ shakl-e-tamannā 'vahshat'
jis ko muddat se na dekhā ho vo kyā yaad rahe

maiñ aksar sochtā rahtā huuñ tere sāmne jā kar
tamannā kyuuñ lab-e-iz.hār se aage nahīñ jaatī

hikāyāt-e-lab-o-ruḳhsār se aage nahīñ jaatī
tamannā kyā jo tere pyaar se aage nahīñ jaatī

maiñ ek ek tamannā se pūchh baiThā huuñ
mujhe yaqīñ nahīñ aatā ki merā sab hai tū

aañkh ke kunj meñ ik dasht-e-tamannā le kar
ajnabī des ko nikle dil-e-tanhā le kar