Tags-Tamanna

kab ham ne gulistāñ chāhā thā kab ham ne bahāreñ māñgīñ thiiñ
ik gul kī tamannā thī ham ko vo bhī to chaman meñ pā na sake

har nafas baḌhtā gayā us kī tamannā kā ḳharosh
lamha lamha isī vahshat meñ nikhartā gayā maiñ

ham-safar ham ne jahāñ naqsh-e-tamannā paayā
ham rah-e-zīst ke is moḌ pe bekār mile

ham rahravān-e-shahr-e-tamannā ko kyā pata
manzil rah-e-talab se kahāñ tak judā bhī hai

zindagī kyā jo basar ho chain se
dil meñ thoḌī sī tamannā chāhiye

tiir khāne kī havas hai to jigar paidā kar
sarfaroshī kī tamannā hai to sar paidā kar

baḌh ga.ī mai piine se dil kī tamannā aur bhī
sadqa apnā sāqiyā yak jām-e-sahbā aur bhī

zabān roko bahak rahe ho surūr-e-do-shīna josh par hai
mai-e-visāl-e-shab-e-tamannā har ek lab se abhī baham hai

jo fasl-e-gul kī tamannā meñ ho ga.e barbād
vo bā-murād haiñ ġham un kā be-samar na samajh

ik ḳhvāb ko āñkheñ rehn rakheñ ik shauq meñ dil vīrān kiyā
jiine kī tamannā meñ ham ne marne kā sabhī sāmān kiyā

fursat kahāñ ki soch ke kuchh gungunā.iye
koī kahīñ halāk-e-tamannā nahīñ rahā

ek qaidī kī tamannā hai nayā shahr mile
shahr aisā ki jahāñ par koī zindān na ho

jur.at-e-arz-e-tamannā kā sabab vo ḳhud hue
mehrbāñ dekhā unheñ lab par savāl aa hī gayā

kisī sūrat jo puurī ho na paa.e
ham ik aisī tamannā kar rahe haiñ

duniyā meñ añdheroñ ke sivā aur rahā kyā
ik terī tamannā so charāġh-e-saharī hai

maiñ tujh ko magar jaan gayā sham-e-tamannā
samjhī thī ki jal jā.egā shā.er hai patiñgā

tum agar chāhte ho koī tamannā na rahe
haath har ek tamannā se uThā.e rakhnā

is se pur-nūr huā merī tamannā kā diyā
ruḳh-e-raushan se yūñhī parda uThā.e rakhnā

un ke aage phailā huā thā dast-e-tamannā ai 'asrār'
yā ki tah-e-ḳhanjar thī rag-e-jāñ maiñ bhī sochūñ tū bhī soch

roz-afzūñ hai merī tamannā aur tirā begāna-pan
is be-rabt sī nazm kā unvāñ maiñ bhī sochūñ tū bhī soch