Tags-Tanhai

yādoñ se kaho merī bālīñ se chalī jaa.eñ
ab ai shab-e-tanhā.ī ārām zarā lūñgā

ham gosha-nashīnoñ se hai mānūs kuchh aisī
jaise ki ye tanhā.ī ho aulād hamārī

kaise kaise rañg haiñ tanhā.ī kī tasvīr meñ
jab kabhī fursat mile tab aa.ine meñ dekhnā

koī na.ī to nahīñ harf-e-haq kī tanhā.ī
jo jānte haiñ vo is amr-e-rab se vāqif haiñ

mohabbat ek ḳhushbū hai hamesha saath chaltī hai
koī insān tanhā.ī meñ bhī tanhā nahīñ rahtā

is gosha-e-uzlat meñ tanhā.ī hai aur maiñ huuñ
ma.ashūq-e-tasavvur se yakjā.ī hai aur maiñ huuñ

vo chaltā hai hamesha bhiiḌ le kar
use ehsās-e-tanhā.ī bahut hai

sharīk-e-ġham na ho koī to achchhā
akelī ho to tanhā.ī bahut hai

ye be-mausam jo purvā.ī bahut hai
surūr-e-dard-e-tanhā.ī bahut hai

kahā thā tum ne tanhā.ī meñ milnā
ab aa jaao ki tanhā.ī bahut hai

us ne ik baar to jhāñkā bhī thā mujh meñ lekin
us se dekhī na ga.ī vus.at-e-tanhā.ī mirī

laraztī chhat shikasta bām-o-dar se baat karnī hai
mujhe tanhā.ī meñ kuchh apne ghar se baat karnī hai

ye joshish-e-girya tanhā.ī ye pichhle pahar kā sannāTā
ashkoñ meñ mujhe kah lene do ye ḳhaas hai qissa aam nahīñ

tanhā.ī meñ kyā kyā na tujhe yaad kiyā hai
kyā kyā na dil-e-zār ne DhūñDī haiñ panāheñ

raheñ ham mahfiloñ meñ yā raheñ duniyā ke mele meñ
akelā chhoḌ kar lekin ye tanhā.ī nahīñ jaatī

'jumbish' koī aa jaa.e is vaqt ḳhayāloñ meñ
tanhā.ī kā aalam hai ehsās ne gherā hai

naqāb-e-shab meñ chhup kar kis kī yaad aa.ī samajhte haiñ
ishāre ham tire ai sham-e-tanhā.ī samajhte haiñ

dasht-e-ġhurbat meñ vahī ālam-e-tanhā.ī hai
sar meñ saudā hai tirā aur tirā saudā.ī hai

ajab be-kaif hai rātoñ kī tanhā.ī ka.ī din se
kisī kī yaad bhī dil meñ nahīñ aa.ī ka.ī din se