Tags-Tanhai

kuchh to ye hai ki mirī raah judā hai tujh se
aur kuchh qarz bhī mujh par tirī tanhā.ī hai

ye surḳh talve ye tanhā.ī āḳhirī hichkī
ab is se aage koī kārvāñ huā to kyā

kaam kuchh aa na sakī rasm-e-shanāsā.ī bhī
shāmil-e-bazm thī shāyad mirī tanhā.ī bhī

shab-e-tanhā.ī kā detī hai jis ko naam ye duniyā
mire siine pe jab aa kar kabhī baiThī ġhazal kah dī

tanhā.ī kī ḳhāmoshī!
ye ghūñT hai ik zahr-e-qātil kā

tanhā.ī kī ḳhāmoshī meñ
bhuut shikast-o-nākāmī ke

tanhā.ī kī ḳhāmoshī meñ
jī bekār ulajhtā hai

ik din jo yūñhī parda-e-aflāk uThāyā
barpā thā tamāshā koī tanhā.ī se aage

tere siine meñ bhī ik daaġh hai tanhā.ī kā
jāntā maiñ to kabhī duur na hotā tujh se

ham na kahte the ki yādoñ ko sambhāle rakhnā
ab jo tanhā.ī kā aalam hai to hairat kyā hai

nā-murād dil kaise sub.h-o-shām karte haiñ kaise zinda rahte haiñ aur kaise marte haiñ
tum ko kab nazar aa.ī ġham-zadoñ kī tanhā.ī ziist be-amāñ kyā hai tum na jaan pāoge

saañs tak lene nahīñ detā thā āvāzoñ kā shor
jab parinde uḌ ga.e sunsān tanhā.ī huī

raat milī tanhā.ī milī aur jaam milā
ghar se nikle to kyā kyā ārām milā

vo tanhā thā to phir tanhā.ī kā dam-sāz honā thā
un āñkhoñ ke liye mujh ko sitāra-sāz honā thā

vo use oḌhe rahā chehre pe ḳhushbū ki tarah
haañ vahī jis shaḳhs ki tanhā.ī gard-ālūd thī

tahlīl ho ga.ī hai havā meñ udāsiyāñ
ḳhālī jagah jo rah ga.ī tanhā.ī bhar ga.ī

banā.ūñ kis ko shab-e-ġham anīs-e-tanhā.ī
ki saath hai mirī taqdīr vo bhī ḳhvāb meñ hai

peḌ chalte haiñ havāoñ se sadā aatī hai
merī tanhā.ī kī ḳhāmosh fazā gaatī hai

merī tanhā.ī ko merā maqsūm kar
merī manzil zamāne kī manzil na ho

vo gosha-e-tanhā.ī meñ paḌhtā hai shab o roz
us ke varaq dil pe hai tahrīr hamārī