Tags-Tasawwur

tarāsh aur bhī apne tasavvur-e-rab ko
tire ḳhudā se to behtar mirā sanam hai abhī

hazāroñ rañg haiñ merī nazar meñ
tasavvur meñ kisī kī anjuman hai

maiñ aaj kal ke tasavvur se shād-kām to huuñ
ye aur baat ki do pal kī zindagānī hai

chalā gayā hai tasavvur kī sarhadoñ se pare
vo ek shaḳhs jo aksar rahā hai āñkhoñ meñ

nit na.e rañg bhare is meñ tasavvur ke mire
dil meñ tasvīr rahī husn-e-sarāpā ho kar

kyuuñ na ab tum se tasavvur meñ karūñ baat suno tum se ye kahnā hai mujhe
tum kahogī nahīñ maiñ vaj.h-e-suḳhan jaan ga.ī

apne lahje kī hī saḳhtī ko tasavvur kar ke
lauT aane kī shab-e-hijr meñ fariyād kare

jāda-e-shahr-e-tasavvur ki rahā rishta-e-jāñ
sūrat-e-gard-e-pareshāñ hai ḳhabar-dār raho

phir kisī taur sameTo ye bikharte hue rañg
yuuñ pareshān tasavvur kī ikaa.ī na rakho

ġham se ghabrā ke kabhī lab pe jo aatī hai hañsī
vo tasavvur meñ mujhe aa ke rulā dete haiñ

ai shoḳh dāñtoñ kā tire yaañ ye tasavvur hai bañdhā
din raat chashm-e-tar se yaañ barsāte haiñ gauhar bhī ham

shahr-e-ummīd haqīqat meñ nahīñ ban saktā
to chalo us ko tasavvur hī meñ ta.amīr kareñ

be-ḳhud huuñ tasavvur meñ kisī barq-e-adā ke
sarmāya-e-taskīñ hai taḌapnā mire dil kā

chāñdnī se tasavvur kā dar vā huā
tum se hotī rahī guftugū der tak

hai tasavvur bas-ki āñkhoñ meñ ḳhat-e-ruḳhsār kā
aa.ine kī tarah jauhar-dār āñkheñ ho ga.iiñ

hai tasavvur roz-o-shab kis kī tilā.ī rañg kā
chashm-e-nargis kī tarah zardār āñkheñ ho ga.iiñ

har vaqt tasavvur meñ hai jo azmat-e-rafta
khoyā huā e.azāz vo pā bhī nahīñ saktā

zulm sahte hue insānoñ ke is maqtal meñ
koī fardā ke tasavvur se kahāñ tak bahle

na ye hai na vo hai na maiñ huuñ na tū hai
hazāroñ tasavvur aur ik aarzū hai

ab tasavvur kī suunī vaadī meñ
roz jashn-e-bahār hotā hai