Tags-Tasawwur

dil kis ke tasavvur meñ jaane rātoñ ko pareshāñ hotā hai
ye husn-e-talab kī baat nahīñ hotā hai mirī jaañ hotā hai

chaman kī āzādiyāñ mo.aḳhḳhar tasavvur-e-āshiyāñ muqaddam
ġham-e-asīrī hai nā-mukammal agar ġham-e-ḳhār-o-ḳhas nahīñ hai

tasavvur meñ tujhe zauq-e-ham-āġhoshī ne bhīñchā thā
bahāreñ kaT ga.ī haiñ aaj tak pahlū mahaktā hai

tasavvur aur hī badmast kā hai 'lutf' ko ab
na aap bahkiye sarshār kaun aap kā hai

saarā din us ke tasavvur se huā kī bāteñ
ḳhvāb ban ke mirī rātoñ ko sajātā hī rahā

ab is ke tasavvur se bhī jhukne lagīñ āñkheñ
nazrāna diyā hai jise maiñ ne dil o jaañ kā

duniyā-e-tasavvur ham ābād nahīñ karte
yaad aate ho tum ḳhud hī ham yaad nahīñ karte

ik tasavvur to hai tasvīr nahīñ
ḳhvāb hai ḳhvāb kī ta.abīr nahīñ

ai vaqt ik nigāh ki kab se khaḌe haiñ ham
ā.īna-e-tasavvur-e-fardā liye hue

abrū kī tasavvur meñ huā qatl mirā dil
phal kyuuñ na mile mard thā talvār bahut kī

jin ko āñkhoñ meñ basāne kī ijāzat bhī nahīñ
vo tasavvur dil-e-bebāk meñ aa jaate haiñ

shahroñ ke tasavvur se bhī ghabrāne lagā dil
sahrā meñ chale jaao to vahshat nahīñ hotī

firāq-e-yār meñ rahtā hai yuuñ tasavvur-e-gor
ḳhayāl jaise musāfir kā ho sarā kī taraf

dam-e-aḳhīr tasavvur hai kis parī-vash kā
ki merī ruuh bhī ban kar parī nikaltī hai

zehan meñ jab koī shīrīñ kā tasavvur aa gayā
sar pe teshoñ ko uThā.e dauḌte aa.e pahāḌ

tasavvur meñ ye kaun aayā zabāñ par kis kā naam aayā
nashāt-e-rūh kā har ik nafas le kar payām aayā

haa.e pūchho na tasavvur ke maze
god meñ tum ko liye baiThe haiñ

rañg bharte haiñ vafā kā jo tasavvur meñ tire
tujh se achchhī tirī tasvīr banā lete haiñ

koī jugnū nahīñ tasavvur kā
kitnī vīrān ho ga.iiñ āñkheñ

zindagī jis ke tasavvur meñ basar kī ham ne
haa.e vo shaḳhs haqīqat meñ kahānī niklā