Tags-Tasawwur

ḳhafā haiñ phir bhī aa kar chheḌ jaate haiñ tasavvur meñ
hamāre haal par kuchh mehrbānī ab bhī hotī hai

har ilm-o-yaqīñ se bālā-tar tū hai vo sipehr-e-tābinda
suufī kī jahāñ nīchī hai nazar shā.ir kā tasavvur sharminda

dekheñ jise ḳhalal hai usī ke dimāġh meñ
sarshār ab tasavvur-e-jānāñ se kaun hai

āñkheñ gesū ke tasavvur meñ rahā kartī haiñ band
lutf dikhlātā hai ye ḳhvāb-e-pareshāñ kyā kyā

dil meñ jo tasavvur hai tirī zulf-e-rasā kā
samjhā huuñ ise maiñ to amal radd-e-balā kā

dostoñ kī bazm meñ kuchh soch kar lab sī liye
varna dāmān-e-tasavvur meñ haiñ taqrīreñ bahut

ek tasvīr-e-tasavvur kī farāvānī thī
ik taḳhayyul ki zamāne se idhar thā hī nahīñ

jo dekhā arsh-e-tasavvur se bārhā sochā
ye kā.enāt bhī aks-e-ravāñ hai yā kuchh aur

rulātā hai mujhe har-dam tasavvur rū-e-jānāñ kā
bharā hai paanī āñkhoñ meñ yahāñ chāh-e-zanaḳhdāñ kā

tasavvur bāñdhte haiñ us kā jab vahshat ke maare ham
to phir karte haiñ aap hī aap kyā kyā kuchh ishāre ham

jis meñ salmā ke tasavvur ke haiñ taare raushan
merī āñkhoñ hai vo ālam-e-jazbāt kī raat

tasavvur hai kahāñ mujh paas terā
maiñ ḳhud bāteñ zabānī kar rahā huuñ

hijr kī shab un kī aamad ke tasavvur meñ 'zahīr'
muntazir ā.ankhoñ ne dāman hī bhigoyā sub.h tak

raat bhar dasht-e-tasavvur meñ bhaTakte hī rahe
jaane kyā un se huī baat ki ham so na sake

koī god meñ jham se aa hī gayā hai
tasavvur hameñ jab bañdhā hai kisī kā

koī tasavvur meñ jalva-gar hai bahār dil meñ samā rahī hai
nafas nafas gungunā rahā hai nazar nazar muskurā rahī hai

hue raushan na phir bhī bām-o-dar fikr-o-tasavvur ke
hazāroñ baar kī bazm-e-jahāñ meñ raushnī maiñ ne

vo aa.e mere tasavvur meñ shukriya un kā
zahe-nasīb mirā jazb rā.egāñ na huā

phir sar-e-bazm koī jām-ba-kaf aatā hai
tark-e-tauba ke tasavvur pe pasīna aayā

sub.h-e-rāhat ke tasavvur ke tufail
har shab-e-ġham muḳhtasar ho jā.egī