Tags-Tasawwur

us kī sūrat kā tasavvur dil meñ jab laate haiñ ham
ḳhud-ba-ḳhud apne se hamdam aap ghabrāte haiñ ham

kyā tasavvur mirī āñkhoñ ne navāzā hai mujhe
ḳhud ko dekhūñ to maiñ ehsās-e-ziyāñ tak dekhūñ

kyā baḌhegā vo tasavvur kī hadoñ se aage
sub.h ko dekh ke yaad aa.e jise shaam kī baat

ek dhundlā sā tasavvur hai ki dil bhī thā yahāñ
ab to siine meñ faqat ik Tiis sī paatā huuñ maiñ

tasavvur meñ jo kī haiñ band āñkheñ
dikhā.ī de rahā kyā jaane kyā hai

ham tasavvur meñ un ke ubharne lage
chashm-e-āhū meñ manzar sañvarne lage

shab-e-firāq jo dil meñ ḳhayāl-e-yār rahā
pas-e-fanā bhī tasavvur meñ intizār rahā

lutf detā hai mujhe terā tasavvur shab-e-ġham
sach kahā karte haiñ achchhoñ kā ḳhayāl achchhā hai

nahīñ zanjīr-e-pā hī ye tasavvur
jo bañdh jaa.e par-e-parvāz bhī hai

mirā tasavvur hai kā.enātī shu.ūr merā jamāliyātī
mire ḳhayāl-o-nazar meñ 'zauqī' koī bashar ajnabī nahīñ hai

shab-e-hijrāñ meñ mat pūchho ki kin bātoñ meñ rahtā huuñ
tasavvur bāñdh us kā sub.h tak kuchh kuchh maiñ kahtā huuñ

ghar kī ta.amīr tasavvur hī meñ ho saktī hai
apne naqshe ke mutābiq ye zamīñ kuchh kam hai

kuchh din se ajab be-kalī ghere hai tasavvur
kuchh din se mujhe apnā hī ghar ghar nahīñ lagtā

jazba-e-shauq-o-tasavvur kī badaulat akasr
dekhtā rahtā huuñ maiñ aks-e-qamar paanī meñ

hasrat-o-armāñ bazm-e-tasavvur dāman-e-sahrā dast-e-junūñ
ḳhushiyoñ ke paiġhām haiñ 'ḳhālid' ġham ke hasīñ lamhāt ke naam

markaz-e-dīda-o-dil terā tasavvur thā kabhī
aaj is baat pe kitnī hañsī aatī hai hameñ

zindagī meñ ka.ī aise bhī mile the sāthī
ruuh ab jin ke tasavvur se bhī ghabrātī hai

jab bhī aatā hai tasavvur tire insānoñ kā
ek fariyād mire muñh se nikal jaatī hai

lagī jab sham.a kī sī tarah ātish ishq ke sar ko
tasavvur shola-rū kā bāñdh kar jal jal pighal sakiye

din ko the ham ik tasavvur raat ko ik ḳhvāb the
ham samundar ho ke bhī is ke liye pāyāb the