Tags-Tasawwur

kamāl-e-ishq tasavvur hai auj par aisā
tire jamāl ko har shai meñ dekhtā huuñ maiñ

unheñ bulā ke tasavvur meñ ham mile 'muztar'
havas to ho ga.ī puurī balā se kuchh na huā

jo tasavvur se māvarā na huā
vo to banda huā ḳhudā na huā

tajallī thī na tābānī tasavvur thā na partav thā
tire jaate hī saare ā.īna-ḳhānoñ ko niiñd aa.ī

ham banā.eñge yahāñ 'sāġhar' na.ī tasvīr-e-shauq
ham taḳhayyul ke mujaddid ham tasavvur ke imaam

mujh ko ye kyā ho jaatā hai ghar kā tasavvur aate hī
jaise ghar suunā suunā lagtā hai kisī ke jaate hī

gunjā.ish-e-tasavvur-e-yak-lafz bhī nahīñ
yaañ har kisī ke vāste afsāna chāhiye

phir mustaqbil ke bhayānak chehre par jab nazreñ paḌtī haiñ
is haibatnāk tasavvur se ham Darte haiñ ghabrāte haiñ

shaguftan kamīñ-gāh-e-taqrīb-jūī
tasavvur huuñ be-mojib āzurdagāñ kā

aaj is soz-e-tasavvur kī ḳhushī meñ ai dost
tā.ir-e-sabr ko āzād kiyā hai maiñ ne

talḳhī-e-daur-e-guzishtā kā tasavvur kar ke
dil ko phir mā.il-e-fariyād kiyā hai maiñ ne

rah-e-vafā meñ bhaTaktī rahtī jo tere sapnoñ meñ gum na rahtī
tire ḳhayāloñ meñ jī rahī huuñ tire tasavvur meñ Dhal rahī huuñ

tujhe dekhā jidhar nigāh ga.ī
thā tasavvur zi-bas tirā hamrāh

shām-e-ġham tere tasavvur hī se āñkhoñ meñ charāġh
varna mere ghar meñ ho aur raushnī tere baġhair

tire dayār talak yuuñ to aa hī jaate haiñ
ye aur baat tasavvur meñ jī jalāte haiñ

kis kī mai-farosh āñkheñ bas ga.iiñ tasavvur meñ
be-niyāz jām-o-mai apnī mai-parastī hai

dil meñ aa baiThā hai dekho dūriyoñ kā devtā
ham jamā.at ke tasavvur se bhī uktāne lage

bāñdhā hai jab se tere tasavvur ko sher meñ
sheroñ ke khul rahe haiñ ma.ānī parat parat